Aýstralııalyq senator bıtkoındy «qarjylyq pıramıda» dep atap, ony synǵa aldy

ASTANA. KAZINFORM – Aýstralııalyq senator Djerard Rennık bıtkoındy «qarjylyq pıramıda» dep atap, bul pikir krıptovalıýta ındýstrııasynyń ókilderi men paıdalanýshylar tarapynan birden teris reaktsııa týdyrdy, dep habarlaıdy Crypto News.

— Eń sońynda bıtkoın 1 mıllıon dollarǵa deıin kóteriledi. Nelikten? Sebebi bul — shekteýli usynysy bar ónimge BlackRock kompanııasy barǵan saıyn kóbirek dollar quıyp jatqan qarjylyq pıramıda. Al bul ónim naqty ne óndiredi? Eshteńe — ony satyp alyp, satyp jatqan myńdaǵan adam sııaqty, — dep jazdy Djerard Rennık H (burynǵy Twitter) platformasynda.

Kvınslend shtatynan saılanǵan senator Rennık 2024 jyly Lıberaldy ulttyq partııadan shyqqan soń «Aldymen halyq» atty popýlıstik partııany basqaryp otyr. Ol ári qaraı bıtkoın men ony saýdalaıtyn treıderler «múldem paıda ákelmeıdi» dep málimdedi.

— Aýstralııaǵa naǵyz ınjenerler kerek, qarjy ınjenerleri emes. Bizge basty qyzmetterdi: energııa, sý jáne kólik sııaqty ınfraqurylymdy qamtamasyz etetin júıeler qajet, — dedi Djerard Rennık.

Rennıktiń bul málimdemesi Aýstralııa premer-mınıstri Entonı Albaneze Endrıý Charltondy ǵylym, tehnologııa jáne tsıfrlyq ekonomıka mınıstriniń kómekshisi etip taǵaıyndaǵannan eki apta ótken soń aıtyldy. Charlton Aýstralııada tsıfrlyq aktıvterdi retteýdi, sonyń ishinde iri krıptobırjalarǵa eldiń Qarjylyq qyzmetter lıtsenzııalaý júıesine saı jumys isteýge múmkindik beretin lıtsenzııalyq rejımdi basqarýǵa tıis. Zań jobasy osy jyldyń sońyna deıin usynylady dep kútilýde.

Eske sala keteıik, Bıtkoın baǵasy alǵash ret 68 myń dollardan asty.