Aýstralııadan Qazaqstanǵa 250 asyl tuqymdy iri qara jetkizildi

ASTANA. KAZINFORM — Batys Qazaqstandaǵy sharýashylyq Aýstralııadan 250 asyl tuqymdy mal aldy, dep habarlaıdy AShM baspasóz qyzmeti.

Avstralııadan Soltústik Qazaqstanǵa 305 bas aberdın-angýs iri qarasy jetkizildi
Foto: QR AShM baspasóz qyzmeti

Qazaqstanda asyl tuqymdy mal basynyń sapasyn arttyrý, aýyl sharýashylyǵy janýarlarynyń tuqymdyq erekshelikterin jetildirý jáne otandyq mal sharýashylyǵynyń genetıkalyq áleýetin arttyrý baǵytyndaǵy jumystar jalǵasyp jatyr.

Salany damytýdyń mańyzdy tetikteriniń biri — shetelden ákelinetin sapaly asyl tuqymdy mal basyn kóbeıtý.

— Osy rette Aýstralııadan Gereford jáne Aberdın-Angýs tuqymdaryna jatatyn 250 iri qara jetkizildi. Mal Aqtóbe qalasyndaǵy Álııa Moldaǵulova atyndaǵy halyqaralyq áýejaıǵa jetkizilip, zańnamada belgilengen veterınarııalyq rásimderden ótti. Elimizdiń veterınarııalyq talaptaryna sáıkes, mal 21 kún boıy karantınde ustaldy. Osy kezeńde mamandar janýarlardyń fızıologııalyq jaǵdaıyn keshendi baǵalap, árqaısysyn tekserýden ótkizdi. Juqpaly aýrýlardyń klınıkalyq belgileriniń joqtyǵy jáne veterınarııalyq ilespe qujattardyń belgilengen talaptarǵa sáıkestigi tekserildi. Sondaı-aq veterınarııalyq-sanıtarııalyq normalardyń saqtalýyna erekshe nazar aýdaryldy, — delingen habarlamada.

Barlyq qajetti rásim aıaqtalǵannan keıin Batys Qazaqstan oblysy Aqjaıyq aýdany Býdarıno aýylynda ornalasqan «Amaner-IZI» sharýashylyǵyna aparady.
Asyl tuqymdy maldy ákelý sharýashylyqtyń tabyndyq-genetıkalyq qoryn keńeıtip, selektsııalyq-asyldandyrý jumystaryn jetildirýge tyń múmkindik beredi.

Gereford pen Aberdın-Angýs tuqymdary joǵary et ónimdiligimen jáne jergilikti jaǵdaıǵa beıimdelý qasıetterimen erekshelenedi. Sondyqtan etti baǵyttaǵy mal sharýashylyǵynda keńinen qoldanýǵa bolady.

Osyǵan deıin Qazaqstannan iri qara men usaq maldyń analyq basyn eksporttaýǵa alty aıǵa tyıym salynǵanyn jazǵanbyz.