Aýstralııadaǵy órt órship barady: birneshe elshilik jabyldy
NUR-SULTAN. QazAqparat – Aýstralııa astanasy Kanberrada alapat órt saldarynan birqatar elshilik jabyldy. Juma kúni jergilikti bılik aptap ystyq pen jeldiń soǵýyna baılanysty órt shyǵý qaýpi týraly eskertti, dep habarlaıdy Financial Times gazeti.
Aýstralııadaǵy Estonııa dıplomatııalyq mıssııa basshysy Kerstı Esmaa (Kersti Eesmaa) estonııalyq elshiliktiń Sıdneıge kóshkenin rastady.
Budan bólek, «aýanyń qatty lastanýy» saldarynan Vengrııa elshiligi jabyldy. Sondaı-aq, Irlandııa, Italııa jáne Izraıl elshilikteri aýa sapasynyń nasharlaýynan ýaqytsha jabyldy.
Aýstralııada tabıǵı órt saldarynan mıllıondaǵan gektar jer órtendi. Sońǵy aılarda myńdaǵan úı janyp, 17 adam qaza tapty. Sıdneı ýnıversıtetiniń málimetinshe, 1 mıllıard janýar qyrylǵan.
