Aýstralııadaǵy órt: Kanberrada tótenshe jaǵdaı jarııalandy
KANBERRA. VVS - QazAqparat – Aýstralııa astanasy aýmaǵy (AEA) bıligi Kanberranyń ońtústiginde qatty órtke baılanysty tótenshe jaǵdaı jarııalady, dep habarlaıdy QazAqparat VVS-ge silteme jasap.
Sheneýnikterdiń aıtýynsha, bul sońǵy onjyldyqtaǵy eń qaýipti órt bolyp otyr. Órt aýmaqtyń ońtústiginde 18 500 gektar aýmaqty sharpyǵan. Kanberra qalasynyń mańyndaǵy turǵyndardy evakýatsııaǵa daıyn bolýǵa shaqyrdy. Sıdneı men Melbýrn arasynda ornalasqan shaǵyn aýdanda 400 myń adam turady.
2003 jyly Kanberra qalasynyń mańyndaǵy orman órtinen tórt adam qaza taýyp, 500-den astamy zardap shekti jáne 470 úı qırady.
«Qazir elorda aýmaǵyna orman órtine baılanysty qaýip tónip tur», - dep málimdedi juma kúni elorda óńiriniń bas mınıstri Endrıý Barr.
«Qazirgi ýaqytta elorda aýmaqtyq úkimeti úshin orman órtiniń qaýpinen basqa mańyzdy másele joq».
Barr myrza órttiń «baǵynbaı ketýi múmkin ekenin» eskertti, sebebi aýa temperatýrasy jelmen birge 40 gradýsqa deıin kóterildi. Ol orman órtiniń Taggeranong aýdanynan ońtústikke qaraı Kanberra parlamenti ǵımaratynan 20 mınýttyq jerde qatty bolǵanyn aıtty. Barr órt sóndirý organdaryna qosymsha kúsh, qural jáne resýrs beretin tótenshe jaǵdaıdyń «Kanberraǵa qaýip tónip turǵanǵa deıin» jalǵasatynyn málim etti.
Ótken beısenbide Kanberra áýejaıynyń aýmaǵyna órt jaqyndaǵandyqtan jabylǵan edi. Úsh amerıkalyq órt sóndirýshi qalaǵa jaqyn mańda orman órtin sóndirip jatyp, ushaqtyń apatqa ushyraýy saldarynan qaza tapty. Aýstralııada qyrkúıektiń basynan beri orman órtinen 33 adam mert bolyp, myńdaǵan úı qırady. 11 mıllıonnan astam gektar jer janyp ketti.
