Aýstralııadaǵy zerthanadan ólimge ákeletin vırýstardyń júzdegen úlgisi joǵalyp ketti

ASTANA. KAZINFORM – Aýstralııanyń Kvınslend shtatyndaǵy zerthanadan ólimge ákeletin vırýstary bar 300-den astam shyny tútik joǵalyp ketti, dep habarlaıdy Kazinform agenttigi Daily Mail-ǵa silteme jasap. 

Habarlanǵandaı, quramynda vırýsy bar 323 tútik jetispeıdi. Olardyń ishinde Hendra vırýsy bar 100-ge jýyq tútik, hantavırýs bar ekeýi jáne lıssavırýs bar 223 tútik ǵaıyp bolǵan.

Úlgiler 2021 jyly joǵalyp ketti, biraq quqyq buzýshylyq tek 2023 jyldyń tamyzynda rastaldy. Zerthanadaǵy synamalar olar saqtalǵan muzdatqysh buzylǵan kezde joǵalǵan dep boljanyp otyr. 

— Bul materıaldardyń dál osy kezeńde joǵalýy alańdaýshylyq týdyryp otyr. Olar jumys istep turǵan muzdatqyshqa rásimdelmegen qujat arqyly aýystyrylǵan, — dep málimdedi baspasóz máslıhatynda Kvıslend shtatynyń bas sanıtarlyq dárigeri Djon Djerrard.

Zerthanadan joǵalǵan vırýstardyń úsh shtamy adam úshin ólimge ákelýi múmkin.

Úlgilerdiń qazir qaıda ekeni, onyń joıylyp-joıylmaýy belgisiz kúıde qalyp otyr. Dece de, synamalar joǵalǵannan keıin halyqqa juqtyrý qaýpi bar eshqandaı derek tirkelgen joq. 

— Qoǵamǵa qaýip tónýi múmkin stsenarııdi elestetý qıyn. Aıta ketý kerek, vırýs úlgileri muzdatqyshtan tys jerde tez buzylyp, juqpaly qasıetterin joǵaltady. Mańyzdysy, sońǵy bes jylda Kvınslend turǵyndary arasynda Hendra vırýsy nemese lıssavırýs juqtyrý jaǵdaılary bolǵan joq jáne Aýstralııada eshqashan hantavırýs juqtyrý jaǵdaıy tirkelmegen, — dep qosty ol. 

Sondaı-aq vırýs úlgileri olardy zııan tıgizý maqsatynda paıdalaný úshin qoldy boldy deýge negiz joq. Vırýstardyń ózi qaýipti bolǵanymen, juqtyrý deńgeıiniń tómendigi olardy mańyzdy genetıkalyq modıfıkatsııasyz bıologııalyq qarý jasaý úshin jaramsyz etedi.