Aýstralııada terrorıstik shabýyldan qaza bolǵandar sany 12 adamǵa jetti

ASTANA. KAZINFORM — Aýstralııanyń Sıdneı qalasynda Bondi Beach jaǵalaýynda bolǵan terrorlyq shabýyldyń mán-jaıy anyqtalyp jatyr. Oqıǵa evreılerdiń Hanýka merekesiniń bastalýyna arnalǵan is-shara kezinde bolǵan, dep habarlaıdy Bild.

Polıtsııanyń málimetinshe, shabýyl saldarynan 12 adam qaza tapqan, olardyń arasynda shabýyldaýshylardyń biri bar. Taǵy 29 adam túrli deńgeıde jaraqat alǵan, onyń ishinde eki polıtsııa qyzmetkeri de bar. Jaralanǵandar qalanyń birneshe aýrýhanasyna jetkizildi, keıbiriniń jaǵdaıy aýyr kúıde qalyp otyr.

Qaza tapqandardyń arasynda ravvın Elı Shlanger de bar ekeni anyqtaldy. Onyń ólimin ózi tıesili bolǵan «Habad-Lıýbavıch» qozǵalysy rastady. Aýstralııa bıligi bul oqıǵany resmı túrde antısemıttik terrorıstik akt dep tanydy.

Polıtsııa dereginshe, eki shabýyldaýshynyń biri aýyr halde aýrýhanada jatyr, ekinshisi atys kezinde kóz jumǵan.

Tergeý organdary úshinshi terrorıstiń bolýy múmkin degen nusqany da tekserip jatyr.

— Úshinshi shabýyldaýshynyń bar ekenin naqty rastaı almaımyn, alaıda biz barlyq múmkin nusqalardy muqııat tekserýimiz kerek, — dedi Jańa Ońtústik Ýels shtaty polıtsııasynyń komıssary Mal Lenon.

ABC telearnasynyń habarlaýynsha, terakt bolǵan jerge jaqyn mańda turǵan kólikten qoldan jasalǵan jarylǵysh qurylǵylar tabylǵan. Olardy saperler zalalsyzdandyryp, brondalǵan kólikpen áketken.

— Sıdneıde Hanýka kezinde bolǵan antısemıttik terrorlyq shabýyl meni qatty kúızeltti. Bul — bizdiń ortaq qundylyqtarymyzǵa jasalǵan shabýyl. Antısemıtızmge Germanııada da, búkil álemde de núkte qoıý qajet, — dep jazdy Germanııa kantsleri Frıdrıh Merts X áleýmettik jelisinde.

Eske salsaq, Sıdneıdegi Bondı jaǵajaıyndaǵy oqıǵadan keminde 10 adam qaza taýyp, 60 adam jaralanǵany habarlandy. Alaıda bul aqparat sol kezde resmı túrde rastalmaǵan edi.

Budan buryn Qazaqstannyń eki azamaty Aýstralııa kazınosynan alaıaqtyq jolmen 1,17 mıllıon dollar utyp aldy dep aıyptaldy.