Aýstralııada parnıktik gazdarmen kúresý úshin 1 mlrd aǵash otyrǵyzylady
ASTANA. QazAqparat - Aýstralııada aldaǵy 30 jylda 1 mlrd aǵash otyrǵyzylady. Bul klımat jónindegi Parıj kelisimindegi maqsattardy oryndaýǵa kómektesedi. Aýqymdy naýqannyń bastalǵanyn el premer-mınıstri Skott Morrıson Twitter-de habarlady.
Ekologtar mundaı iri naýqan 2030 jyly 18 mln tonna parnıktik gazdan qutylýǵa kómektesedi dep úmittenip otyr.
«Bizdiń úkimet jańa aktsııa týraly jarııalady. Onyń barysynda toǵyz óńirlik orman ortalyq-habyn quramyz. Jańa aǵashtar otyrǵyzý josparyn júzege asyrý úshin 20 mln [aýstralııalyq] dollar ($14,3 mln) qosymsha qarjy qarastyrylǵan», - delingen habarlamada.
Bul joba tek kógaldandyryp qana qoımaı, jańa jumys oryndaryn ashýǵa múmkindik beredi. Qurlyqtaǵy ormandar kóleminiń artýy parnıktik gazdardyń jylyna 26-28% qysqarýyna jol ashady.
