Aýstralııada oıyn qumyndaǵy ýly zattarǵa baılanysty shamamen 70 mektep jabylady

ASTANA. KAZINFORM — Kmart jáne Target dúkender jelileri óz ónimderin keri qaıtaryp aldy, sebebi olardyń keıbir úlgilerinen asbest izderi tabylǵan, dep habarlaıdy Sky News.

Aýstralııa bıligi bul qum astana aýmaǵyndaǵy barlyq mektepte qoldanylǵandyqtan, qazir jan-jaqty tekserý júrgizilip jatqanyn málimdedi.

Qaýipti qum saqtalǵan 69 mektep dúısenbi kúni qajetti sharalardy júrgizý úshin jabylady. Al 23 oqý orny ashyq bolady. Alaıda olardyń úsheýinde az mólsherde qum qory tabylǵan, degenmen ol oqshaýlanǵan jáne oqý barysyna áser etpeıdi. Qalǵan 20 mektepte qum múlde bolmaǵan.

Úkimet mektepterdi jabý — oqýshylardyń, qyzmetkerlerdiń jáne qoǵamnyń qaýipsizdigin qorǵaýǵa baǵyttalǵan májbúrli shara ekenin túsindirdi. Bılikke shuǵyl túrde jaǵdaıdy baǵalaý, ǵımarattardy tazartý jáne yqtımal qaýipterdi joıý qajet. Bul sheshim Aýstralııanyń Básekelestik jáne tutynýshylar quqyǵyn qorǵaý jónindegi komıssııasynyń keńesinen keıin qabyldandy.

Komıssııa Kadink dekoratıvti qumynda hrızotıl asbestiniń izderi anyqtalǵanyn habarlaǵan, bul qum da mektepterde qoldanylǵan.

Úkimet ókilderi ónimdi keri qaıtarý — aldyn ala saqtyq sharasy ekenin atap ótti. Qazir qaýip-qaterdi túpkilikti baǵalaý úshin qosymsha ǵylymı synaqtar júrgizilip jatyr.

Asbest — bul jińishke talshyqty sılıkatty mıneraldar tobyna tán jalpy ataý. Oǵan hrızotıl, amozıt, krokıdolıt sııaqty mıneraldar jatady. Asbest óziniń órtke tózimdiligi, beriktigi jáne jylý oqshaýlaý qasıetterimen belgili. Ol qurylys salasynda keńinen qoldanylǵanymen, birinshi dárejeli kantserogen retinde tanylǵan ári asbestoz jáne qaterli isik sııaqty aýrýlardy týdyrady.

Aıta keteıik, buǵan deıin Aýstralııa men Ońtústik Koreıa Labubu oıynshyqtarynyń ýly kóshirmesi shyǵarylyp jatqanyn eskertti.