Aýstralııada orman órti 16 úıdi jalmap, myńdaǵan turǵyn evakýatsııalandy

ASTANA. KAZINFORM — Aýstralııada orman órti saldarynan 16 turǵyn úı órtenip ketti. Órt Jańa Ońtústik Ýels aýmaǵyn qamtyp otyr, dep jazdy Belta.

Eldiń eń úlken shtatynyń myńdaǵan turǵyndary evakýatsııalanýǵa mindetteldi. Jergilikti bılik málimetinshe, shtat aýmaǵynda 70-ten astam orman órti tirkelgen. Eń iri órt 10 myń gektardy qamtyp, oǵan eń joǵary qaýiptilik deńgeıi berilgen. Órtten eń kóp zardap shekken aımaq — Sıdneıden 45 km qashyqtyqtaǵy Kýlvong qalasy.

Ortalyq jaǵalaýdaǵy Fegans-Beı jáne Voı-Voı aýdandarynda da eń joǵary qaýiptilik deńgeıi engizildi. Bul aımaqtarda 350 myńnan astam adam turady.

Meteorologııa bıýrosynyń habarlaýynsha, 42 gradýsqa deıin jetken aptap ystyq órt qaýpin kúrt kúsheıtti. Premer-mınıstr Entonı Albanız turǵyndardy tótenshe qyzmetterdiń nusqaýlaryn saqtaýǵa jáne bir-birine qoldaý kórsetýge shaqyrdy.

Meteorologtar men órt sóndirýshilerdiń aıtýynsha, birneshe salystyrmaly tynysh jyldardan keıin Aýstralııany bıyl asa qaýipti órt maýsymy kútip tur.