Aýstralııada ólimge ákeletin órmekshilerdiń jańa túri tabyldy
ASTANA. KAZINFORM — Aýstralııanyń shyǵys jaǵalaýynda ólimge ákeletin ýly órmekshilerdiń jańa túri tabyldy.
Bul týraly Sıdneı ulttyq murajaıy men Nıýkasl ýnıversıtetiniń málimdemesinde aıtyldy, dep habarlaıdy TASS.
Órmekshiniń bul túri kontınenttiń eń qaýipti omyrtqasyzdarynyń biri — Sıdneı shuńqyrly órmekshiler tobyna jatatyny atap ótildi. Іriligimen jáne myqty ýymen erekshelenetin órmekshiniń jańa túrleri Nıýkasl qalasyn jáne onyń aınalasyn mekendegen, al olardyń kishileý túrleri Sıdneıde jáne megapolıske irgeles aýdandarda jıi kezdesedi.
Nıýkasl ýnıversıtetiniń klınıkalyq toksıkologııa kafedrasynyń meńgerýshisi Djeff Isbısterdiń aıtýynsha, bul órmekshiler shamamen 20 jyl buryn baıqalǵan.
— Negizi bul órmekshiler burynnan osynda bolǵan, biraq olardyń basqalarǵa qaraǵanda erekshe ekenin endi ǵana túsindik. Degenmen, qolda bar antıdot onyń ýyna qarsy tura alatyny qýantady, — dedi ol.
Jańa túrdi sıpattaý úshin ǵalymdar jaqynda alynǵan júzdegen órmekshilerdiń DNQ-syn ótken ǵasyrdyń basyndaǵy órmekshilermen salystyryp kórgen.
Atrax christenseni dep atalatyn jańa túrdiń ashylýyna ákeletin zertteýler Sıdneı baýyrymen jorǵalaýshylar saıabaǵyndaǵy zerthanaǵa ádettegiden úlken jáne óte agressıvti órmekshi ákelgennen keıin bastalǵan.
— Áýeli, bul órmekshiler osy túrdegi basqa órmekshilermen salystyrǵanda keremet úlken, sonymen qatar olardy ereksheleıtin birqatar sıpattamalary bar ekenine nazar aýdardyq, — dedi zerthana qyzmetkeri Keın Krıstensen.
Sondaı-aq, Sıdneı shuńqyrly órmekshiniń jańa túriniń eń iri ókilderiniń biri 2025 jyldyń basynda Sıdneı baýyrymen jorǵalaýshylar saıabaǵyna alyp kelingeni habarlandy. Dene uzyndyǵy rekordtyq 9,2 sm bolatyn órmekshige aýstralııalyq akter Krıs Hemsvorttyń esimi berildi.
Órmekshilerdiń bul jańa túri Sıdneıden 160 km radıýsta jáne qalanyń ózinde kezdesedi. Olar joǵary agressıvtiligimen erekshelenedi. 1927 jyldan 1981 jylǵa deıin bul órmekshilerdiń shaǵýynan 13 adam qaıtys bolǵan, biraq 1981 jyly olardyń ýynan jasalǵan antıdot alyndy, sodan beri birde-bir ólim tirkelmegen.
Eske salsaq, budan buryn Aýstralııadaǵy zerthanadan ólimge ákeletin vırýstardyń júzdegen úlgisi joǵalyp ketkeni belgili boldy.