Aýstralııada kúnnen qorǵaıtyn kremderge qatysty janjal shyqty

ASTANA. KAZINFORM – Aýstralııada kúnnen qorǵaıtyn kremderge qatysty janjal órshidi. Elde eń tanymal ári qymbat sanalatyn ónimderdiń keıbiri kútken nátıjeni bermeıtini anyqtaldy, dep habarlaıdy BBC News.

Álemde teri qaterli isigi eń kóp tirkeletin elderdiń biri sanalatyn Aýstralııada 34 jastaǵy Reıch esimdi turǵyn kúnnen qorǵaný sharalaryn qatań saqtap kelgen. Bala kezinen-aq ol bas kıimsiz kóshege shyqpaýdy ádetke aınaldyryp, kún saıyn birneshe ret kúnnen qorǵaıtyn krem jaqqan. Soǵan qaramastan, ótken jyly dárigerler onyń murnynan qaterli isik anyqtaǵan.

— Men qatty abyrjyp, ashýlandym. Óıtkeni barlyǵyn durys jasap júrmin dep oılaıtynmyn, – dedi ol suhbatynda.

Reıch qoldanǵan kremniń keıbir synaqtarda kún sáýlesinen naqty qorǵanys bermeıtini anyqtaldy. Táýelsiz Choice Australia uıymy júrgizgen zertteý birneshe tanymal markalardyń ónimderi qaptamada kórsetilgen deńgeıde qorǵaı almaıtynyn kórsetti.

Bul jańalyq qoǵamda úlken rezonans týdyrdy. Tutynýshylar narazylyq tanytyp, medıtsınalyq baqylaý organdary tekseris bastady. Birqatar ónimder saýdadan alynyp tastaldy. Sonymen qatar kúnnen qorǵaıtyn kremder ındýstrııasynyń álemdik deńgeıde qalaı retteletinine qatysty suraqtar paıda boldy.

Kosmetıkalyq hımııa salasynyń mamany Mıshel Vong bul másele tek Aýstralııaǵa ǵana emes, búkil álemge ortaq ekenin atap ótti.

Aıta keteıik, Avstralııada jasandy júrekpen ómir súretin álemdegi alǵashqy adam turady.