Aýstralııada kishkentaı pıngvınderdiń 40 paıyzyna jýyǵy qyrylýy múmkin
ASTANA. KAZINFORM – Aýstralııada qus tumaýynyń H5 vırýsy kishkentaı pıngvınder popýlıatsııasyna qaýip tóndirip otyr. Mamandar indet taralǵan jaǵdaıda Melbýrn mańyndaǵy Sent-Kılda jaǵalaýyndaǵy pıngvınderdiń 20–40 paıyzy qyrylýy múmkin ekenin eskertti, dep habarlaıdy Іndependent.
Sent-Kıldada shamamen 1 400 kishkentaı pıngvın uıalaıdy. Bıiktigi nebári 30 santımetr bolatyn bul qustar – álemdegi eń kishkentaı pıngvın túri. Aýstralııadaǵy olardyń negizgi popýlıatsııasy Vıktorııa shtatynda, sonyń ishinde Fıllıp aralynda mekendeıdi.
Earthcare St Kilda eriktiler uıymynyń prezıdenti Lana Ostınniń aıtýynsha, H5 vırýsynyń bul túriniń pıngvınderge naqty qalaı áser etetini ázirge belgisiz.
Avstralııanyń Aýyl sharýashylyǵy mınıstrliginiń málimetinshe, bıyl elde jabaıy teńiz qustary arasynda H5 vırýsyn juqtyrýdyń 78 jaǵdaıy tirkelgen. Onyń jeteýi Vıktorııa shtatyndaǵy aıdarly qaratorǵaılarda anyqtalǵan.
Apta basynda Ońtústik Aýstralııa jaǵalaýyndaǵy Boden-Roks aralynda qus tumaýynan jabaıy qustardyń alǵash ret jappaı qyrylǵany rastaldy. Áýe arqyly júrgizilgen baqylaý kezinde 50-ge jýyq óli jáne 30 aýrý qus anyqtalǵan.
Vıktorııa bıligi de Nelson mańynan kóptegen óli jáne aýrý qustar tabylǵanyn habarlap, qosymsha zertteý júrgizip jatyr. Mamandar indettiń taralýy kúsheıip kele jatqanyn aıtady.
Qorshaǵan orta mınıstri Mıýrreı Ýott aldaǵy ýaqytta jabaıy janýarlar arasynda jappaı qyrylý oqıǵalary taǵy qaıtalanýy múmkin ekenin málimdedi. Onyń aıtýynsha, indettiń tabıǵı ortada taralýyn toqtatý múmkin emes, sondyqtan negizgi mindet – jergilikti janýarlar popýlıatsııasynyń tózimdiligin arttyrý.
H5 vırýsy Aýstralııaǵa eń sońǵy bolyp jetti. Buǵan deıin ol 2021 jyldan bastap Eýropa, Amerıka, Afrıka, Azııa jáne Antarktıdaǵa taralyp, mıllıondaǵan jabaıy jáne aýyl sharýashylyǵy qustarynyń qyrylýyna sebep bolǵan.
Eske sala ketsek, byltyr qazan aıynda Germanııanyń soltústiginde qus tumaýy órship bara jatqanyn jazdyq. Keıinirek atalǵan elde qus tumaýynyń kesirinen 500 myń qus joıyldy.
Al bıyl kóktemde Ońtústik Koreıada qus tumaýynyń órshýinen bılik qaýipsizdik sharalaryn kúsheıtti.
