Aýstralııada Konfýtsıı ınstıtýttary jabylyp jatyr

ASTANA. KAZINFORM – Aýstralııada alty ýnıversıtettiń janyndaǵy Konfýtsıı ınstıtýttary jabyldy. Bul týraly Lianhe Zaobao basylymy habarlady. 

Basylymnyń jazýynsha, keıingi jyldary Aýstralııa úkimeti Konfýtsıı ınstıtýttaryna baqylaýdy kúsheıtken. Synaýshylar Konfýtsıı ınstıtýttary akademııalyq erkindikti shekteýmen birge, Qytaı bıliginiń ýnıversıtetterdiń oqý baǵdarlamasyna teris yqpal etýine múmkindik týdyrady dep jazǵyrady.

Belgili bolǵandaı, Melbýrn ýnıversıteti, Kvınslend ýnıversıteti, Jańa Ońtústik Ýels ýnıversıteti (UNSW) jáne Batys Avstralııa ýnıversıteti (UWA) Konfýtsıı ınstıtýtyn birlesip basqarý týraly Qytaı joǵary oqý oryndarymen jasalǵan kelisimsharttardyń merzimi aıaqtaǵan soń, tıisti kelisimdi uzartpaýǵa sheshim qabyldaǵan.

Adelaıda ýnıversıtetiniń janyndaǵy Konfýtsıı ınstıtýtynyń da jabylǵany týraly aqparat tarady. Alaıda ýnıversıtet basshylyǵy bul jaıynda resmı málimdeme jasaýdan bas tartty. 

Roıal Melbýrn tehnologııalyq ınstıtýty (RMIT) Konfýtsıı ınstıtýtyn 2021 jyly japqan bolatyn. 

Qazirgi ýaqytta Aýstralııada jeti Konfýtsıı ınstıtýty jumysyn jalǵastyryp jatyr. Sıdneı ýnıversıteti óz janyndaǵy Konfýtsıı ınstıtýtynyń áli de ashyq ekenin, biraq Qytaıdan qarjylaı qoldaý almaıtynyn málimdedi. Instıtýt negizinen úzdiksiz bilim berý ortalyǵy arqyly qoǵamǵa qytaı tili kýrstaryn usynady. Kvınslend tehnologııalyq ýnıversıteti tıisti máseleniń kelesi jyly qaıta qaralatynyn aıtty.