Aýstralııada «katastrofalyq» deńgeıdegi órt qaýpi jarııalandy

ASTANA. KAZINFORM — Aýstralııanyń birneshe aımaǵynda ekstremaldy ystyq áli de saqtallyp otyr. Ońtústik Vıktorııa shtaty úshin erteńgi kúnge órt qaýpiniń deńgeıi eń joǵary sanatqa — «katastrofalyq» dep kóterildi. Bul týraly Anadoly habarlady.

BBC málimetinshe, eldiń Kvınslend óńirinen basqa barlyq shtaty men aýmaqtarynda «kúshti» jáne «ekstremaldy» ystyqqa baılanysty eskertý jarııalanǵan.

Vıktorııa shtatynda ashyq aýada ot jaǵýǵa tolyq tyıym salyndy. Órttiń joǵary qaýpi saldarynan erteń shamamen 450 mektep pen balabaqsha ýaqytsha jabylady dep habarlandy. Órt sóndirýshiler Vıktorııa men Jańa Ońtústik Ýels shtattaryndaǵy órt oshaqtarymen kúresip jatyr.

Aýstralııanyń meteorologııalyq bıýrosynyń ókili Angýs Haıns juma kúni aýa temperatýrasy eń joǵary deńgeıge jetetinin jáne eldiń soltústiginiń basym bóligi úshin óte ystyq kún bolatynyn aıtty.

Buǵan deıin Melbýrnde aýa temperatýrasy 41 °C jetkeni habarlanǵan — bul sońǵy alty jyldaǵy maksımým, Adelaıdada 43 °C, al astanasy Kanberrada 37 °C-qa deıin kóterilgen.

Osydan buryn jeltoqsannyń basynda Aýstralııada orman órti 16 úıdi jalmap, myńdaǵan turǵyn evakýatsııalandy.