Aýstralııada ǵylymǵa belgisiz jándik túri tabyldy

ASTANA. KAZINFORM — Aýstralııanyń Kvınslend shtatynda Aterton jazyǵyndaǵy ný ormannan buryn ǵylymǵa belgisiz taıaqsha tárizdi jándik tabyldy. Bul týraly The Guardian habarlady. 

Uzyndyǵy 40 santımetr, salmaǵy golf dobyndaı bolǵan bul jándik Aýstralııada buryn-sońdy tabylǵan eń aýyr jándik bolyp sanalady.

Ǵalymdar ony acrophylla alta dep atady. Bul jańalyqty Djeıms Kýk ýnıversıtetiniń ǵalymy professor Angýs Emmott pen onyń áriptesi Ross Kýpland ashty. Emmott bir qoldanýshynyń áleýmettik jelide jarııalaǵan fotosy Rosstyń nazaryn aýdaryp, ǵalymdardy jańa túrdi ashýǵa jetelegenin aıtty.

Olar birneshe tún izdep, aqyry Millaa Millaa jáne Mount Hypipamee ormandary arasynan analyq jándikti taýyp aldy. Olar ony aǵashtan tómenge túsirý úshin uzyn taıaq paıdalandy.

Buryn ǵalymdar bul jándikti baıqamaǵan bolýy múmkin, óıtkeni ol óte bıik aǵashtardyń butaqtarynda ómir súredi. Ol sondaı-aq sýyq jáne ylǵaldy klımatta ómir súredi, sondyqtan onyń denesi úlken.

Zertteý barysynda analyq jándikdi úı jaǵdaıynda baqylap, kútip-baptap, jumyrtqalaryn jınady. Emmott taıaqsha jándiktiń jumyrtqa pishini basqalardan aıtarlyqtaı erekshelenetinin atap ótti. Kelesi qadam — osy túrdiń atalyǵyn tabý, biraq bul protsess qıyn, óıtkeni atalyq jándikter óte jińishke jáne analyqtarynan kóptegen jaǵynan erekshelenedi.

Kvınslend murajaıynyń entomologi Nıkol Gýnter bul jańalyqtyń Aýstralııanyń bıoáralýandyǵyn túsinýdegi mańyzdy qadam ekenin aıtty, óıtkeni kontınentte áli ǵylymǵa belgisiz kóptegen jándik bar. Onyń paıymdaýynsha, Aýstralııadaǵy jándikterdiń 70 paıyzy áli zerttelmegen.

Eske sala keteıik, klımat saldarynan Tývalý turǵyndary Aýstralııaǵa jappaı kóshe bastady.