Aýstralııada ǵasyr tasqyny: myńdaǵan úıler jaryqsyz qaldy, adamdar shatyrda otyr
ASTANA. KAZINFORM — Aýstralııanyń shyǵys jaǵalaýynda rekordtyq sý tasqyny boldy. Bundaı tasqyn ǵasyrǵa jýyq ýaqyt boıy bolǵan joq. Jańa Ońtústik Ýels shtatynda zardap shekken eldi mekender apat aımaǵy dep jarııalandy. Sońǵy málimetter boıynsha, eki adam qaza taýyp, 2 adam iz-túzsiz joǵalǵan, dep habarlaıdy Mir24.tv.
5,5 myńnan astam úı jaryqsyz qaldy. Buǵan tolassyz jaýǵan jańbyr kináli. Sý tasqyny saldarynan aǵashtar elektr symdaryna qulady. Jóndeý brıgadalary ázirge nysandardy tekserip, jaryqty qalpyna keltire almaı otyr. Olar qazir áýe patrýlin jumyldyrmaq, biraq mamandar birneshe kún elektr jaryǵy bolmaıtynyn eskertip úlgerdi. Qazir sý basqan aımaqta 140-tan astam eldi meken bar. Olardyń turǵyndary úılerin tastap ketýge májbúr boldy. Keıbir adamdar tipti shatyrlardan qutqarylýda.
— Bul — shtat halqy úshin qorqynyshty apat. On myńdaǵan úıler qazirdiń ózinde sý tasqyny aımaǵynda jáne biz aldaǵy 24 saǵatta budan da jaman jańalyqtarǵa daıynbyz, - dedi shtat premeri Krıs Mınns.
Zardap shekkenderge kómek kórsetý úshin tótenshe jaǵdaılar qyzmetiniń 2 myńnan astam qyzmetkeri tartylyp, áskerıler jumyldyryldy.
Aýstralııanyń shyǵys jaǵalaýyndaǵy 50 myńnan astam turǵynǵa evakýatsııalaý týraly eskertý berildi. Kontınenttiń shyǵys jaǵalaýynyń Graftonnan Nıýkaslǵa deıingi 500 shaqyrymdyq bóligindegi eldi mekenderdi evakýatsııalaý týraly habarlamalar tarqatyldy. Eń qıyn jaǵdaı Mennıng, Gastıngs, Makleı jáne Nambýkka ózenderiniń quıylystarynda ornalasqan qalalar men eldi mekenderde baıqalady. Onda jańbyrdan bólek, ózender arnasynan asyp jatyr.
Sońǵy aptada eldiń shyǵysyndaǵy birqatar aımaqtarda 600 mm-den astam jaýyn-shashyn tústi.
Gıdrometeorologııa bıýrosynyń málimetinshe, beısenbi kúni shyǵys jaǵalaýdyń ortalyq bóliginde jaýyn-shashynnyń táýliktik mólsheri keminde 300 mm boldy. Jańbyr jumaǵa qaraı ońtústikke qaraı jyljyp, Sıdneı men onyń mańyndaǵy qalalarǵa jaýady.
Eske sala keteıik, Aýstralııada bıliktiń ruqsatymen 700 koala atyldy.