Aýstralııada Diamond Princess kemesiniń jolaýshysy qaıtys boldy
SIDNEI. QazAqparat - Diamond Princess krýız kemesiniń bortynda koronavırýs juqtyrǵan aýstralııalyq azamat Aýstralııa aýmaǵynda atalǵan indetten kóz jumǵan alǵashqy adam boldy, dep habarlaıdy QazAqparat jergilikti BAQ-qa silteme jasap.
Jergilikti BAQ-tyń málimetinshe, ótken aıda Japonııadan evakýatsııalanǵan 78 jastaǵy er adam Pert qalasyndaǵy aýrýhanada qaıtys boldy. Sondaı-aq onyń 79 jastaǵy áıelinen de vırýs tabylǵan. Qazir ol aýrýhanada jatyr, onyń jaǵdaıy birqalypty.
Aýstralııa úkimeti senbi kúni COVID 19 vırýsy órship turǵan Irannan keletin týrısterdiń elge kirýine tyıym salǵany týraly habarlady.
Sondaı-aq Aýstralııa osy vırýs alǵash shyqqan Qytaıdan keletin halyqqa da elge kirýge tyıym salýdy 7 naýryzǵa deıin uzartqany atap ótildi.
