Aýstralııada áıel burynǵy kúıeýiniń týystaryn túski asqa shaqyrdy: 4 qonaqtyń úsheýi qaıtys boldy
BRISBEN. QazAqparat – Aýstralııanyń ońtústigindegi Leongata qalasynyń turǵyny Erın Patterson 29 shildede burynǵy kúıeýiniń ata-anasyn, enesiniń ápkesi men onyń jubaıyn otbasylyq túski asqa shaqyrdy, dep habarlaıdy QazAqparat CNN-ge silteme jasap.
Erın qonaqtarǵa túski asqa sańyraýqulaq taǵamyn usyndy. Bir apta ótpeı qonaqtardyń úsheýi ýly sańyraýqulaqtan ýlaný belgilerimen qaıtys boldy. Vıktorııa shtaty polıtsııasynyń málimetinshe, 70 jastaǵy Geıl Patterson men onyń 66 jastaǵy ápkesi Hızer Ýılkınson aýrýhanada qaıtys boldy. Bir kúnnen keıin Geıldiń 70 jastaǵy kúıeýi Don kóz jumǵan. Tórtinshi qonaq, Hızer Ýılkınsonnyń 68 jastaǵy kúıeýi ıAn aýrýhanada jatyr. Onyń jaǵdaıy aýyr. Habarlanǵandaı, oǵan baýyr transplantatsııasy qajet. Bul Leongata shaǵyn qalasyn dúr silkindirdi.
Dúısenbide jergilikti BAQ-pen sóıleskende 48 jastaǵy Erın Patterson qatty kúızelgenin jáne bolǵan jaǵdaıǵa áli sene almaıtynyn aıtty. Dúısenbidegi brıfıngte Vıktorııa polıtsııasynyń adam óltirý bóliminiń detektıvi Dın Tomas Pattersonnyń kúdikti ekenin aıtty, óıtkeni tamaqty ol daıyndaǵan jáne odan aýyrmaǵan jalǵyz eresek adam. Ol sondaı-aq Erın Pattersonnyń kúıeýi Saımonmen ajyrasqanyn, biraq olardyń dostar sııaqty aralasyp júrgenin qosyp ótti. Sol kúni túski asqa Erın men Saımonnyń eki balasy da otyrdy, biraq olar basqa tamaq jegen. Olardan aýrý belgileri anyqtalǵan joq.
Tomastyń aıtýynsha, Erın Pattersonnyń qonaqtaryndaǵy aýrý belgileri aramqulaqtan ýlaný belgilerine uqsas. Sáýir aıynda Victoria Health aqshyl aramqulaqty (Amanita phalloides) «óte ýly» dep atap, ony taǵam retinde paıdalaný ishtiń qatty aýyrýy, júrek aınýy, qusý jáne ishtiń ótýi sııaqty aýrý belgilerin týdyratynyn eskertti. Ýlanýdyń alǵashqy belgileri saqtalsa da, bul sańyraýqulaqtardy tutyný baýyrdyń aýyr zaqymdalýyna jáne ólimge ákelýi múmkin.
Erınniń túski asqa qandaı sańyraýqulaq bergeni áli belgisiz. Patterson tilshilerdiń qandaı taǵam daıyndady degen suraǵyna jaýap bermeı, úıine kirip ketti. Polıtsııada senbi kúni Erın Pattersonnyń úıinde tintý júrgizilip, sot-medıtsınalyq saraptama úshin birneshe zat tárkilengenin rastady. Tártip saqshylary jergilikti turǵyndardy jabaıy sańyraýqulaq jınaýdan bas tartýǵa shaqyrady.
