Aýstralııada avtobýs aýdarylyp, 10 adam qaza tapty
SIDNEI. QazAqparat –Aýstralııa óńirleriniń birinde avtobýs jol apatyna ushyrap, 10 adam qaza tapty, taǵy 20-dan astamy aýrýhanada jatyr, dep habarlaıdy QazAqparat BBC News-ke silteme jasap.
Avtobýs jolaýshylary jeksenbi kúni keshke sharap jasaıtyn eldi mekendegi toıdan qaıtyp kele jatqan.
Kólik Jańa Ońtústik Ýels shtatyndaǵy Hanter-Vellı óńirinde Greta qalasy mańyndaǵy Ýaın-Kaýntı-Draıvta aýdarylǵan.
Polıtsııa qyzmetkerleriniń aıtýynsha, oqıǵanyń jaı-japsary tekserilip jatyr. 58 jastaǵy avtobýs aıdaýshy ustaldy.
Apat jergilikti ýaqytpen 23:30 shamasynda bolǵan. Avtobýs tasjoldan aınalma jolǵa burylys kezinde aýdarylǵan.
Jergilikti polıtsııa ókiliniń sózinshe, qaza bolǵandar sany artýy múmkin. 25 jolaýshy aýrýhanaǵa jetkizildi, olardyń ekeýin ushaqpen áketken.
Avtobýs áli de aýdarylǵan kúıi jatyr, onyń astynda adamdar bolýy múmkin. Oqıǵa ornyna avtobýsty kóterý úshin kran jiberiledi.
Polıtsııa ókilderi apat bolǵan kezde osy aýdanda qalyń tuman bolǵanyn atap ótti.
