Aýstralııada aptap ystyqqa baılanysty eskertý jarııalandy

ASTANA. KAZINFORM — Aýstralııanyń Vıktorııa shtatynda orman órtterimen kúres júrip jatqan tusta shamadan tys ystyqqa baılanysty eskertý jasaldy, dep habarlaıdy Anadoly.

ABC News habarlaýynsha, bılik ókilderi Vıktorııa shtatynyń Otveıs aımaǵyndaǵy baqylaýǵa alynbaǵan orman órtteri aptap ystyqtyń saldarynan odan ári taralýy múmkin ekenin málimdegen.

Aýstralııanyń Meteorologııa bıýrosynyń ókili Dıana Idı keıbir aýdandarda 2009 jyldan beri tirkelgen eń uzaq aptap ystyq kezeńi bolýy múmkin ekenin eskertti.

Onyń aıtýynsha, Mıldýra, Hoýptýn jáne Ýolpeýp aımaqtarynda aýa temperatýrasy 48 gradýsqa, Horshamda – 47 gradýsqa, al Gamıltonda – 46 gradýsqa deıin kóteriledi dep kútilip otyr.

Vıktorııa shtatynyń tótenshe jaǵdaılar qyzmetiniń ókili Tım Vıbýsh keıbir óńirlerde aýa temperatýrasy bir apta boıy 40 gradýstan joǵary deńgeıinde saqtalatynyn aıtty.

Órt sóndirýshiler joǵary temperatýraǵa qaramastan, órttiń taralýyn boldyrmaý jumystaryn jalǵastyryp jatyr.

Otveıs aımaǵyndaǵy órt saldarynan Melbýrn qalasynda aýa sapasy aıtarlyqtaı nasharlaǵan.

Al Ońtústik Aýstralııa shtatynyń Adelaıda qalasynda qatty ystyqqa baılanysty eskertýlerge oraı 26 qańtarda atap ótiletin Aýstralııa kúnine arnalǵan is-sharalar toqtatyldy. Bul kún 1788 jyly alǵashqy aǵylshyn flotynyń Aýstralııa qurlyǵyna kelgenin eske alýǵa arnalǵan jáne eldiń qurylǵan kúni retinde sanalady.

Buǵan deıin Aýstralııanyń shyǵys jaǵalaýy boıyndaǵy ondaǵan jaǵajaı, sonyń ishinde Sıdneıdegi jaǵajaılar da, sońǵy eki kúnde akýlalardyń tórt ret shabýyl jasaýyna baılanysty seısenbi kúni jabylǵanyn jazǵanbyz.