Aýstralııada alǵash ret sańyraýqulaqtan jasalǵan tabyt jerleý rásimine paıdalanyldy
ASTANA. KAZINFORM — Aýstralııanyń Jańa Ońtústik Ýels shtatynda áıel adam sańyraýqulaqtan jasalǵan ekologııalyq taza tabytqa jerlenip, elde qorshaǵan ortaǵa zııany tımeıtin jerleý ádisi alǵash ret qoldanyldy, dep habarlaıdy Kazinform agenttigi The Guardian basylymyna silteme jasap.
Nıderlandynyń Loop Biotech kompanııasy oılap tapqan bul tabyt sańyraýqulaq jipshýmaǵy men qarasora talshyqtaryn ósirý arqyly jasalǵan.
Tabyt klımattyq jaǵdaıy baqylanatyn arnaıy bólmede bir apta ishinde daıyndalady. Al jer qoınyna tapsyrylǵannan keıin shamamen 45 kún ishinde topyraqta ydyrap ketedi.
Bul úderis organıkalyq qaldyqtardyń tabıǵı jolmen ydyraýyna uqsaıdy. Tabyt ýaqyt óte kele shirip, qorektik zattarǵa baı topyraqqa aınalady. Onyń shirý merzimi dástúrli aǵash tabytpen salystyrǵanda áldeqaıda qysqa, óıtkeni aǵash tabyttyń tolyqtaı joıylýyna 50 jylǵa deıin ýaqyt ketýi múmkin.
Kompanııa negizin qalaýshynyń aıtýynsha, salmaǵy shamamen 30 keli bolatyn sańyraýqulaq pishindi tabyttar tabıǵı ydyraý protsesin jedeldetip, Aýstralııadaǵy jerleý salasyn ekologııalandyrýǵa yqpal etedi.
— Bul — tabıǵatqa qurmet kórsetýdiń bir joly. Sańyraýqulaq ósip, tabıǵı ortaǵa sińip ketedi. Onyń basty paıdasy — topyraqty baıytyp, qunaryn arttyrýynda, — dedi Loop Biotech kompanııasynyń basshysy Bob Hendrıks.
Aýstralııalyqtardyń shamamen 70%-y máıitti órteýdi tańdaǵanymen, bul tásil qorshaǵan ortaǵa aıtarlyqtaı áser etedi. Sarapshylardyń esebinshe, bir krematsııadan shamamen 125 kelige jýyq kómirqyshqyl gazy bólinedi.
Keıingi jyldary jerleýdiń ekologııaǵa qolaıly jańa tásilderi keńinen taraı bastady. Olardyń biri — krematsııaǵa uqsas, alaıda ottyń ornyna sý qoldanylatyn siltili gıdrolız. Sonymen qatar máıitti balzamdamaı, tabıǵı jolmen jáne taıaz qabirge jerleý tásilderi de qoldanyla bastady.
Eske salaıyq, buǵan deıin Qazaqstanda jerleý rásiminiń baǵasy ózgergenin habarlaǵanbyz.
