Aýstralııada akýla shabýyl jasaǵan serferdiń denesi tabylmaı jatyr
Ońtústik Aýstralııa polıtsııasy boljam boıynsha, akýla shabýylynan mert bolǵan er adamnyń máıitin izdep jatyr, dep habarlaıdy Kazinform agenttigi VVS basylymyna silteme jasap.
55 jastaǵy er adam seısenbi kúni tańerteń Eır túbegindegi Strıkı-Beı qalasynan ońtústikke qaraı Granites Beach jaǵajaıyna jaqyn mańda serfıngpen aınalysyp júrgen.
Kýágerlerdiń sózinshe, sol kezde oǵan akýla shabýyldaǵan.
Qutqarýshylar jergilikti volonterlerdiń kómegimen onyń denesin áýe jáne sý ishi arqyly izdep jatyr.
Bıyl osy shtatta akýla adamǵa úshinshi ret shabýyl jasap tur.
Mamyr aıynda Strıkı-Beı qalasynan shamamen 120 shaqyrym jerde akýla shabýylynan serfer qaıtys bolǵan edi.
Qazannyń basynda taǵy bir azamat zardap shekti, biraq aman qaldy.
Seısenbi kúni serferge qandaı akýla shabýyl jasaǵany ázirge belgisiz. Biraq kýágerlerdiń jergilikti BAQ-qa habarlaýynsha, onyń uzyndyǵy 4 metrden asady.
9News dereginshe, er adam sol kezde sýda bolǵan alty serferdiń biri edi, biraq ol bárinen uzaqqa ketip qalǵan.
Granites Beach jaǵajaıy Ońtústik Aýstralııa shtatynyń astanasy Adelaıda qalasynan shamamen 700 shaqyrym jerde ornalasqan.
