Aýstralııada qoltyraýyndar mekendeıtin ózende Olımpıada jarystary ótedi
ASTANA. KAZINFORM – Aýstralııanyń Kvınslend shtatyndaǵy Fıtsroı ózeni Brısbende ótetin 2032 jylǵy Olımpıada jáne Paralımpıada oıyndary kezinde akademııalyq esý, baıdarka jáne kanoe jarystaryn ótkizýge bekitildi, dep habarlaıdy BBC.
Nysandy bekitý aldynda onyń halyqaralyq jarystar talaptaryna sáıkestigine táýelsiz tehnıkalyq baǵalaý júrgizilgen.
Oıyndardyń táýelsiz ınfraqurylym jáne úılestirý basqarmasynyń málimetinshe, Fıtsroı ózenindegi keshen qazirdiń ózinde esý jattyǵýlary men jarystaryn ótkizý úshin paıdalanylady. Sonymen qatar ózende qoltyraýyndar anyqtalǵan jaǵdaıda arnaıy qaýipsizdik hattamalary ázirlengen.
«Brısben-2032» uıymdastyrý komıtetiniń prezıdenti Endrıý Lıverıs buǵan deıin qoltyraýyndardan tónetin qaýipti asyra baǵalamaýǵa shaqyrǵan.
– Muhıtta akýlalar bar, biraq biz soǵan qaramastan serfıngpen aınalysamyz. Biz ne isteı almaıtynymyzdy emes, ne isteı alatynymyzdy oılaýymyz kerek. Oılaý tásilińizdi ózgertińiz, – dedi ol.
Fıtsroı ózeni teńiz qoltyraýyndarynyń mekeni sanalady. Aýstralııada olardy salties dep ataıdy. Bul baýyrymen jorǵalaýshylar tuzdy sýda da, tuşy sýda da tirshilik ete alady jáne uzyndyǵy alty metrden asady.
Fıtsroı ózenindegi teńiz qoltyraýyndarynyń jalpy sany shamamen 500 dep baǵalanady.
Aıta keteıik, 2032 jylǵy jazǵy Olımpıada oıyndary Aýstralııadaǵy Brısben qalasynda ótkiziletin bolyp bekitildi.
