Aýstralııada 16 jasqa tolmaǵan balalarǵa YouTube akkaýnttaryna kirýge tyıym salynady
ALMATY. KAZINFORM – Aýstralııada 16 jasqa tolmaǵan balalarǵa YouTube saıtynda akkaýnt ashýǵa tyıym salynady. Bul – jastarǵa arnalǵan álemdegi alǵashqy áleýmettik jelilerge tyıym salýdyń bastamasy, dep habarlaıdy Kazinform Euronews arnasyna silteme jasap.
Sheshim eldiń ınternet retteýshisi ótken aıda úkimetten YouTube-ti 16 jasqa tolmaǵan balalarǵa arnalǵan áleýmettik jelilerge tyıym salýǵa qosýdy suraǵannan keıin qabyldandy. Aldyńǵy sheshim YouTube-ke 2025 jyldyń sońynda kúshine enetin bul saıasatty aınalyp ótýge múmkindik berdi.
– Áleýmettik medıanyń qoǵamǵa zııandy ekenin bilemiz. Bizdiń úkimet pen parlament jas avstralııalyqtardy qorǵaý úshin áreket etýge daıyn, - dedi Aýstralııa premer-mınıstri Entonı Albaneze.
16 jasqa tolmaǵan balalarǵa Snapchat, TikTok, Facebook, Instagram jáne X sııaqty jelilerge de kirýge tyıym salyndy.
Kóptegen aýstralııalyq keıbir jas shekteýlerimen kelisip otyr. Ótken aıda júrgizilgen saýalnamada 10 respondenttiń 9-y áleýmettik jelilerde qandaı da bir «jas shekteýleri» bolǵanyn qalaıtyndyqtaryn jetkizgen.
Atalmysh elde 10-15 jas aralyǵyndaǵy 4 aýstralııalyqtyń 3-eýi YouTube-ti paıdalanady. Bul olardy TikTok jáne Instagram sııaqty basqa iri platformalarǵa qaraǵanda tanymal etedi.
Jańa erejelerge sáıkes, 16 jasqa tolmaǵan balalar YouTube-ke kire alady, biraq tirkele almaıdy.
YouTube bul máselege qatysty arnaıy málimdeme de jasady.
– Bizdiń ustanymymyz anyq: YouTube – bul tegin, joǵary sapaly mazmundy kitaphanasy bar beıne almasý platformasy, - dedi kompanııa ókilderi.
Óz kezeginde atalǵan kompanııa úkimetpen jumys isteýdi jalǵastyra otyryp, atalǵan másele boıynsha tıimdi qadamdardy qarastyryp jatqanyn aıtty. Aýstralııalyq BAQ bul zańdy daý týdyrýy múmkin dep habarlady. Tyıym resmı túrde 10 jeltoqsanda kúshine enedi.
Eske sala keteıik, buǵan deıin aýstralııalyq senator bıtkoındy «qarjylyq pıramıda» dep atap, ony synǵa alǵanyn jazǵan edik.