Aýstralııa jasóspirimderge áleýmettik jelini shektedi: BUU qoldaý bildirdi

ASTANA. KAZINFORM – Aýstralııa Premer-mınıstri Entonı Albaneze eli álemde alǵash bolyp jasóspirimderge áleýmettik jelilerdi paıdalanýǵa tyıym salatynyn málimdedi. Ol áleýmettik jeliler balalarǵa tóndiretin qaýipterdiń «únemi ózgerip otyratynyn» atap ótti, dep habarlaıdy AZÁRTADJ. 

Bul týraly ol Nıý-Iorkte BUU Bas Assambleıasy aıasynda ótken «Tsıfrlyq dáýirde balalardy qorǵaý» atty is-sharada aıtty.

Qazirgi tańda úkimetter men tehnologııalyq kompanııalar Aýstralııanyń alǵashqy el bolyp 2024 jyldyń jeltoqsanynan bastap 16 jasqa deıingi tulǵalarǵa áleýmettik jelilerdi paıdalanýǵa tyıym salý bastamasyna erekshe nazar aýdaryp otyr.

Bılik áleýmettik jelilerdi basqaratyn kompanııalardan qoldanýshylardyń jasyn jappaı tekserýdi emes, jasandy ıntellekt pen minez-qulyq derekterin paıdalana otyryp anyqtaýdy talap etip otyr.

— Bul tolyq qaýipsizdikti qamtamasyz etpese de, durys baǵyttaǵy mańyzdy qadam, — dedi Albaneze.

Eýropalyq komıssııa tóraıymy Ýrsýla fon der Lıaıen sózinde «Aýstralııa úlgisi ony shabyttandyrǵanyn» jetkizdi.

Aýstralııada 2024 jyldyń qarashasynan bastap kúshine engen tyıym jasóspirimderdiń áleýmettik jelilerde akkaýnt ashý jasyn qazirgi 13-ten 16-ǵa deıin ulǵaıtýdy kózdeıdi.

Albaneze úkimetiniń bul bastamasy jasóspirimderdiń áleýmettik jelilerdi shamadan tys paıdalanýynan týyndaıtyn psıhıkalyq densaýlyqqa zııan, dezınformatsııa, qorqytý jáne zııandy dene beınelerin taratý sııaqty máselelerdi negizge ala otyryp usynyldy.

Premer-mınıstr bul qadamdy balalardy ómiriniń eń mańyzdy kezeńinde qorǵaýǵa baǵyttalǵan «aqylǵa qonymdy, biraq keshigip jasalǵan shara» dep atady. 

Aıta ketelik Germanııada 16 jasqa deıingi balalarǵa TikTok pen Instagram-ǵa tyıym salý usynyldy.