Aýstralııa jaǵajaılary akýla shabýyldaryna baılanysty jabyldy

ASTANA.KAZINFORM - Aýstralııanyń shyǵys jaǵalaýy boıyndaǵy ondaǵan jaǵajaı, sonyń ishinde Sıdneıdegi jaǵajaılar da, sońǵy eki kúnde akýlalardyń tórt ret shabýyl jasaýyna baılanysty seısenbi kúni jabyldy.

AZERTADJ agenttiginiń habarlaýynsha, Sıdneıden shamamen 400 shaqyrym soltústikte ornalasqan Port-Makkýorı mańyndaǵy jaǵajaılar serfıngpen aınalysyp júrgen er adamǵa akýla shabýyl jasaǵannan keıin jabylǵan. Densaýlyq saqtaý organdarynyń málimetinshe, ol qazir aýrýhanada, jaǵdaıy turaqty.

Surf Life Saving New South Wales (NSW) uıymynyń atqarýshy dırektory Stıven Pırstiń aıtýynsha, qazirgi kezeńde jaǵajaılarǵa barmaý usynylady.

- Sýdyń sapasy óte nashar, bul akýlalarynyń belsendiligine asa qolaıly jaǵdaı jasap otyr, – dedi Pırs.

Jaǵajaılardyń jabylýy Ońtústik jartysharda jaz mezgiliniń qaq ortasynda boldy. Bul kezde ádette Aýstralııanyń jaǵajaılary jergilikti turǵyndar men týrısterge toly bolady.

Sondaı-aq dúısenbi kúni akýla 10 jastaǵy balany serfıng taqtasynan qaǵyp túsirip, taqtanyń bir bóligin tistep julyp alǵanymen, jaraqat almady. Al bir kún buryn basqa bir bala qalalyq jaǵajaıda akýla tistep alǵannan keıin aýyr hálde aýrýhanaǵa jetkizilgen.

Polıtsııa Sıdneıdiń soltústik jaǵalaýy boıynda ornalasqan Northern Beaches dep atalatyn mýnıtsıpaldyq aýdandaǵy barlyq jaǵajaı qosymsha habarlamaǵa deıin jabyq bolatynyn málimdedi.

Akýlalardyń shabýyldary birneshe kúnge sozylǵan nóser jaýynnan keıin tirkeldi. Nóser jańbyr saldarynan aılaq pen oǵan jaqyn jaǵajaılar sýǵa tolyp, akýlalar úshin qolaıly jaǵdaı qalyptasqan. Bul akýla túri tuşylaý (aralas) sýlarda keń taralǵan. Ádette akýlalar adamdarǵa shabýyl jasamaıdy, alaıda laılanǵan sý olardyń kórý qabiletin tómendetip, qandaı da bir nysanmen soqtyǵysý qaýpin arttyrady. Mundaı jaǵdaıda «ózin qorǵaý nemese qyzyǵýshylyq tanytý maqsatynda tistep alýy múmkin» dep jazdy akýla minez-qulqyn zertteýshi ǵalym Krıs Pepın-Neff Sydney Morning Herald gazetine jarııalanǵan baǵanynda.

Onyń aıtýynsha, qatty jaýyn-shashyn káriz sýlarynyń teńizge aǵýyn da kóbeıtedi, al bul óz kezeginde akýlalar qorektenetin usaq balyqtardy tartady.

Tabıǵatty qorǵaý uıymdarynyń deregine sáıkes, Aýstralııada jyl saıyn shamamen 20 akýla shabýyly tirkeledi, olardyń úsheýinen azy ǵana ólimmen aıaqtalady. Bul kórsetkishter el jaǵajaılaryndaǵy sýǵa batý oqıǵalarynyń sanymen salystyrǵanda áldeqaıda tómen.

Aıta ketelik Aýstralııada sportshy akýla shabýylynan qaza tapqany týraly jazǵan edik.