Aýstralııa Tývalý turǵyndary úshin arnaıy klımattyq vıza usynady

ASTANA. KAZINFORM — Arhıpelag baıaý batyp bara jatqandyqtan, Tývalý halqynyń úshten biri Aýstralııaǵa arnaıy klımattyq vıza alýǵa ótinish bildirdi, dep habarlaıdy Reuters agenttigi Tývalýdyń BUU-daǵy elshisi Tapýgao Folefýǵa silteme jasap.

Aýstralııa men Tývalý 2023 jyly arhıpelag turǵyndaryna klımattyq vıza berý týraly kelisimge qol qoıdy. Endi, mine, mundaı vızalardy rásimdeý múmkindigi paıda bolyp, 1124 adam ony paıdalanyp úlgerdi. Ótinish bergenderdiń sany, onyń ishinde otbasy músheleri – 4052 adam. Tývalýda 11 000-nan az halyq bar.

Aýstralııalyq klımattyq vızany alǵan tývalýlyqtar elde turý, jumys isteý jáne oqý múmkindigine ıe bolady. Sonymen qatar olar aýstralııalyqtarmen birdeı negizde densaýlyq saqtaý jáne bilim berý qyzmetterin paıdalana alady. Jyl saıyn nebári 280 vıza bólinip, ótinish berýshiler arasynda lotereıa oınatylady. Folefý «osy múmkindikti qarastyratyn adamdardyń sanyna tańǵalǵanyn» aıtty.

Tývalý - aýdany 26 sharshy metr jáne 10 600 halqy bar toǵyz shaǵyn atolldan (saqına tárizdi marjan araldary) turatyn aral memleketi. Ǵalymdardyń boljamy boıynsha, qazirgi jahandyq jylyný úrdisi saqtalatyn bolsa, 2100 jylǵa qaraı el aýmaǵynyń 95 paıyzy sý astynda qalady. Sonymen birge, keıbir sarapshylar arhıpelag 2050 jylǵa qaraı adam turýǵa jaramsyz bolady dep otyr. 2023 jyly Tývalý konstıtýtsııasyna ózgerister engizdi, oǵan sáıkes memleket búkil aýmaǵy sý astynda qalsa da ómir súre beredi.

Eske sala keteıik, Venetsııa 2150 jyly sý astynda qalýy múmkin.