Aýstralııa tarıhyndaǵy eń iri áskerı oqý-jattyǵý jıyndary bastaldy

ASTANA. KAZINFORM — Aýstralııada Talisman Sabre 2025 áskerı oqý-jattyǵý jıyndary bastaldy. Bul jattyǵýlarǵa 35 000-nan astam áskerı qyzmetker qatysyp jatyr.

Talisman Sabre 2025 oqý-jattyǵýlary Aýstralııada osymen on birinshi ret ótkizilýde jáne el tarıhyndaǵy eń aýqymdy ári eń kúrdeli áskerı jattyǵýlar sanalady.

Úsh apta boıy Aýstralııa men onyń seriktes elderinen kelgen 35 000-nan astam áskerı qyzmetker eldiń ártúrli óńirlerinde — Kvınslend, Soltústik aýmaq, Batys Aýstralııa, Jańa Ońtústik Ýels shtattarynda jáne Rojdestvo aralynda jattyǵýlarǵa qatysady. Bıyl alǵash ret jattyǵýlar Aýstralııa aýmaǵynan tys, Papýa — Jańa Gvıneıada da ótedi.

Oqý-jattyǵýǵa AQSh, Kanada, Fıdjı, Frantsııa, Germanııa, Úndistan, Indonezııa, Japonııa, Nıderlandy, Jańa Zelandııa, Norvegııa, Papýa — Jańa Gvıneıa, Fılıppın, Ońtústik Koreıa, Sıngapýr, Taıland, Tonga jáne Ulybrıtanııa elderiniń áskerı qyzmetkerleri qatysady. Al Malaızııa men Vetnam baqylaýshy retinde qatysady.

Aýstralııa Qorǵanys mınıstrliginiń málimetinshe, jattyǵýlar aıasynda áskerı atystar men dala jattyǵýlary, desant túsirý, qurlyqtaǵy manevrler, sondaı-aq áýe jáne teńiz operatsııalary josparlanǵan. Sondaı-aq Aýstralııa qorǵanys kúshteriniń jańa múmkindikteri kórsetiledi — olardyń qatarynda UH-60M Black Hawk tikushaǵy men Precision Strike Missile (joǵary dáldiktegi zymyran) bar.

Buǵan deıin Qytaı Halyq azattyq armııasy ushqyshsyz apparattar men jerdegi jaýyngerlik robottardyń qatysýymen taktıkalyq oqý-jattyǵýlar ótkizgenin jazǵan edik.