Aýstralııa polıtsııasy Sıdneıdegi teraktiniń DAISh-ke qatysy baryn málimdedi

ASTANA.KAZINFORM — Aýstralııanyń Jańa Ońtústik Ýels shtatynda bolǵan qarýly shabýyl terrorıstik DAISh (Qazaqstanda tyıym salynǵan - red.) uıymynyń yqpalymen jasalǵan. Mundaı qorytyndyny Aýstralııa polıtsııasy aıtty, dep Anadoly agenttigi jazdy.

Shabýyl saldarynan 15 adam qaza taýyp, ondaǵan adam jaralanǵan.

Aýstralııa Federaldyq polıtsııasynyń (AFP) komıssary Krıssı Barretttiń aıtýynsha, shabýylǵa qatysy bar 50 jastaǵy kúdikti oqıǵa ornynda oqqa ushty, al 24 jastaǵy ekinshi kúdikti jaralanyp, aýrýhanaǵa jetkizilgen.

Komıssardyń málimdeýinshe, aýrýhanada jatqan kúdiktige aýyr aıyptar taǵylatyn bolady. Tergeý áli bastapqy kezeńde bolǵandyqtan, onyń barysyna áser etýi múmkin málimetter ázirge jarııalanbaıdy.

Polıtsııanyń dereginshe, shabýyl DAISh terrorıstik uıymynyń yqpalymen jasalǵan.

Jańa Ońtústik Ýels shtaty polıtsııasynyń komıssary Mal Lenon kúdiktilerdiń qarasha aıynda Fılıppınge barǵanyn atap ótti. Bul derek tergeý barysynda muqııat tekseriledi.

Sonymen qatar 24 jastaǵy kúdiktiniń kóliginde DAISh uıymynyń qoldan jasalǵan týlary bolǵan.

Osy ýaqytta Aýstralııa premer-mınıstri Entonı Albaneze aýrýhanada jatqan sırııalyq Ahmed ál-Ahmedke arnaıy baryp shyqqanyn aıtty. Ahmed shabýyl kezinde qaskúnemderdiń birin qarýsyzdandyryp, ózi de jaraqat alǵan.

Premer-mınıstr Ahmedti «naǵyz batyr» dep atap, kóptegen adamnyń ómirin saqtap qalǵany úshin alǵysyn bildirdi. Onyń aıtýynsha, Ahmedke taǵy bir operatsııa jasalýy tıis.

Eske sala keteıik, terakt Bondi Beach jaǵajaıynda, ıýdeılerdiń Hanýka merekesiniń bastalýyna arnalǵan is-shara kezinde bolǵan.

Sondaı-aq tergeý barysynda shabýylǵa qatysy bar tulǵalar ákesi men balasy ekeni anyqtaldy. Sońǵy málimetter boıynsha, bul terakt saldarynan 16 adam qaza taýyp, 40 adam jaralanǵan.

Germanııa, EO jáne Túrkııa Aýstralııadaǵy terrorıstik shabýyldy aıyptady.