Aýstralııa polıtsııasy: Sıdneıdegi lańkesterdiń ákesi men balasy ekeni anyqtaldy
ASTANA. KAZINFORM — Sıdneıde 15 adam qaza taýyp, 40 adam jaralanǵan teraktini jasaǵan qylmyskerler ákeli-balaly bolyp shyqty. Bul týraly baspasóz máslıhatynda Avstralııanyń Jańa Ońtústik Ýels shtaty polıtsııasynyń komıssary Mal Lenon málimdedi, dep habarlaıdy Reuters agenttigi.
Tergeý derekterine sáıkes, Bondaı jaǵajaıynda adamdarǵa shabýyl jasaǵandar — Sıdneıdiń ońtústik-batysynda ornalasqan Bonnırıgg aýdanynda turatyn eki turǵyn ekeni belgili boldy.
«24 jastaǵy er adam ustalý kezinde aýyr jaraqat aldy, al onyń 50 jastaǵy ákesi qaza tapty», dep málimdedi polıtsııa komıssary.
Lenonnyń aıtýynsha, shabýylǵa qatysqan adamdardyń eshqaısysy qandy oqıǵany aldyn ala josparlaǵanynyń eshbir belgisi joq. Sondaı-aq ol shabýyl jasaýshylardyń biriniń shamamen 10 jyl boıy qarý ustaýǵa lıtsenzııasy bolyp, atys qarýyn zańdy túrde ıelengenin atap ótti.
Qazirgi tańda Jańa Ońtústik Ýels shtatynyń polıtsııasy Sıdneıdegi Bondaı qalalyq jaǵajaıyn tolyqtaı jaýyp, teraktiniń sebepteri men mán-jaıyn tergeý júrgizý kezeńinde oǵan jaqyn ornalasqan turǵyn kvartaldardy da qorshaýǵa aldy. Bul týraly vedomstvo taratqan málimdemede aıtylǵan.
Málimdemege sáıkes, dúısenbi kúni tańerteń oqıǵa orny keńirek qorshalyp, Bondaı jaǵajaıy men oǵan irgeles joldar jabylǵan. Sondaı-aq Birikken kontrterrorıstik toptyń detektıvteri atalǵan oqıǵany tergeýdi bastaǵany da habarlandy.
Eske sala ketsek, keshe Sıdneıdegi shabýyldan qaza tapqandar sany 16-ǵa jýyqtady.
Buǵan deıin Hanýkka merekesin toılaý kezinde Sıdneı jaǵajaıynda atys bolǵanyn habarlaǵanbyz. Ol kezde keminde on adam qaza tapqan edi.