Aýstralııa men Frantsııada koronavırýs tirkeldi
NUR-SULTAN. QazAqparat - Koronavırýs juqtyrý oqıǵalary Aýstralııa men Frantsııada tirkeldi, dep habarlaıdy QazAqparat.
Er adam Aýstralııanyń Vıktorııa shtatyndaǵy Melbýrn aýrýhanasynda ızolıatorda jatyr.
Melbýrnda jatqan naýqas 50 jastaǵy qytaılyq azamat. Jaqynda ǵana 2019-nCoV koronavırýsynyń oshaǵy Ýhan qalasynan kelgen.
Ol Melbýrnge Gýanchjoýdan China Southern Airlines CZ321 reısimen 19 qańtar, jeksenbi kúni kelgen. Kelmes buryn 2 apta Ýhan qalasynda bolǵan.
Onyń jaǵdaıy qalypty dep baǵalanýda jáne dárigerlerdiń jiti baqylaýynda.
Vıktorııa shtatynyń densaýlyq saqtaý mınıstrligi koronavırýs juqtyrǵan adamdar taǵy anyqtalýy múmkin ekenin málimdep, Gýanchjoýdan kelgen reıste bolǵan basqa da jolaýshylarmen baılanys ornatyp jatyr.
Sondaı-aq, Frantsııanyń densaýlyq saqtaý mınıstri Anes Býzın arnaıy baspasóz konferentsııasyn ótkizip, elde eki adamdy arnaıy tekserý oń nátıje berip, olardan koronavırýs anyqtalǵanyn habarlady.
Onyń aıtýynsha, naýqastardyń biri Bordodaǵy emhanaǵa jatqyzyldy, ekinshisi Parıjde dárigerlerdiń baqylaýynda.
Bordoda jatqan azamat jaqynda Qytaıdan oralyp, sodan keıin Nıderlandyǵa sapar shekkenin aıtty. Ekinshi vırýs juqtyrǵan azamat ta Qytaıǵa saparmen barǵan.
Aıta ketý kerek, Qytaı resmı túrde dúısenbi kúni vırýstyń adamnan adamǵa juǵýy múmkin ekenin málimdedi. Ol elde koronavırýstyń jańa túrin juqtyrǵandar sany 440 adamǵa jetkeni jáne osy aýrýdan toǵyz adamnyń kóz jumǵany habarlandy. Sondaı-aq, Qytaıda taraǵan pnevmonııa Taıland pen AQSh-ta tirkeldi.Qazaqstan saqtyq sharasy retinde koronavırýsty anyqtaıtyn praımerlerdi satyp alýdy bastady. QR Densaýlyq saqtaý mınıstrligi elimizde koronavırýstyq ınfektsııa tirkelmegenin resmı aıtty.
