Aýstralııa keme jasaý zaýytyn qurýǵa qomaqty qarjy bóledi
ASTANA. KAZINFORM – Aýstralııa AQSh jáne Ulybrıtanııamen AUKUS seriktestigi aıasynda ıadrolyq sýasty qaıyqtaryn jetkizýge arnalǵan keme jasaý zaýytyn qurýǵa 3,9 mıllıard aýstralııalyq dollar (shamamen 2,76 mıllıard AQSh dollary) bóledi, dep habarlaıdy Kazinform Reuters agenttigine silteme jasap.
2021 jyly engizilgen AUKUS baǵdarlamasy el tarıhyndaǵy eń iri qorǵanys ınvestıtsııasy boldy. Baǵdarlama aıasynda 2027 jyldan bastap bul elde AQSh-tyń Vırdjınııa klasyndaǵy súńgýir qaıyqtary ornalastyrylady. Sonymen qatar 2030 jyldan bastap Aýstralııaǵa birneshe osyndaı sýasty qaıyqtary satylmaq. Odan bólek Ulybrıtanııa men Aýstralııanyń atomdyq sýasty qaıyqtarynyń jańa býynyn birlesip ázirleý men óndirýdi de josparlap otyr.
Aýstralııa premer-mınıstri Entonı Albanese Ońtústik Aýstralııanyń Adelaıda qalasyndaǵy Osborn keme jasaý zaýytyna 3,9 mıllıard aýstralııalyq dollar kóleminde bastapqy ınvestıtsııa jasalatynyn habarlady. Ol bul qarjylandyrýdy Aýstralııanyń ıadrolyq súńgýir qaıyqtar flotyn qurý úshin mańyzdy dep atady.
Resmı derekterge sáıkes, jobanyń jalpy quny aldaǵy birneshe onjyldyqta 30 mıllıard aýstralııalyq dollarǵa jetýi múmkin.
Qazirgi ýaqytta Osbornde AUKUS kelisiminiń negizgi quramdas bóligi sanalatyn aýstralııalyq ıadrolyq súńgýir qaıyq flotynyń qurylysyna jaýapty ASC kompanııasy men brıtanııalyq BAE Systems kompanııasynyń bólimsheleri jumys isteıdi. Keme jasaý zaýytynda negizgi qurylys jumystary bastalmas buryn, Kollınz klasyndaǵy súńgýir qaıyqtarǵa tehnıkalyq qyzmet kórsetý jumystarynyń negizgi bóligi atqarylady.
Ońtústik Aýstralııanyń premer-mınıstri Pıter Malınaýskas bólingen qarajat ınfraqurylymdy damytýǵa baǵyttalatynyn atap ótti. Bul ınfraqurylym ıadrolyq sýasty qaıyqtaryn jasaý jáne qyzmet kórsetý úshin qajetti jaǵdaılardy qamtamasyz etedi.
Budan buryn Aýstralııa jaǵajaılary akýla shabýyldaryna baılanysty jabylǵanyn jazǵanbyz.