Aýstralııa fýtboldan álem chempıonaty fınaldyq kezeńine shyqty

ASTANA. KAZINFORM - Fýtboldan 2026 jylǵy álem chempıonaty fınaldyq kezeńine taǵy bir joldamaǵa Aýstralııa quramasy qol jetkizdi.

Aýstralııalyq fýtbolshylar Azııa qurlyǵy boıynsha irikteý kezeńinde syrt alańda Saýd Arabııasyn 2:1 esebimen tize búktirdi. Sol arqyly S tobynda Japonııa quramasynan (22 upaı) keıin 19 upaımen ekinshi orynǵa kóterildi.

Aıta ketsek, budan buryn Azııadan Iran, Ózbekstan, Ońtústik Koreıa, Iordanııa, Japonııa quramalary qol sozdy.

Sondaı-aq qazirge deıin álem chempıonatyna uıymdastyrýshy elder retinde AQSh, Meksıka, Kanada osyndaı múmkindikke ıe bolsa, muhıt aımaǵynan Jańa Zelandııa, Ońtústik Amerıkadan Argentına oǵan qatysatyn elderdiń qataryna qosyldy.

Dúbirli dodada alǵash ret 48 qurama baq synaıdy. Onyń 16-sy Eýropa, 8-i Azııa, 9-y Afrıka, 6-y Soltústik Amerıka, 6-y Ońtústik Amerıka qurlyǵyna bólinse, 1-i muhıt aımaǵy elderine qaralǵan. Al 2 joldama pleı-off satysy arqyly anyqtalady.

Aıta ketsek, Qazaqstan quramasy 2026 jylǵy álem chempıonatynda J tobynda Ýelske (1:3), Soltústik Makedonııaǵa (0:1) jol berip, Lıýksembýrgti (2:0) qapy qaldyrdy. Týrnır kestesinde úsh upaımen tórtinshi orynda keledi.