Aýstralııa Eýroodaqtyń qaýymdastyrylǵan múshesi bola ala ma
ASTANA. KAZINFORM – Aýstralııa úkimeti eldiń Eýropalyq odaqqa qaýymdastyrylǵan múshe bolýy múmkin degen usynysqa túsinikteme berdi. Kanberra qazirgi ýaqytta EO-men saýda kelisimin aıaqtaýǵa basymdyq berip otyr, dep haálembarlaıdy Euronews.
Aýstralııa úkimetiniń ókili Euronews-ke bergen suhbatynda EO men el arasyndaǵy qarym-qatynas buryn-sońdy bolmaǵan deńgeıde nyǵaıǵanyn aıtty. Onyń sózinshe, Kanberra EO–Aýstralııa saýda kelisimin aıaqtaýǵa múddeli.
– Bul – bir býynǵa bir ret keletin kelisim. Ol fermerlerimizge, eksporttaýshylarǵa, óndirýshiler men kásipkerlerge EO-nyń 27 eline jáne 450 mln tutynýshyǵa jol ashady. Aýstralııa – saýdaǵa táýeldi el, sondyqtan jahandyq turaqsyzdyq jaǵdaıynda saýda seriktestikterin keńeıtý ekonomıkalyq turǵydan tıimdi, – dedi úkimet ókili.
Al Jańa Zelandııa úkimeti Reuters agenttigine EO-men qaýymdastyrylǵan múshe bolý jóninde eshqandaı kelissóz júrgizilmegenin málimdedi.
Bul másele Eýroparlament tóraǵasy Roberta Metsolanyń Aýstralııa men Jańa Zelandııaǵa da EO-nyń qaýymdastyrylǵan múshesi bolý usynylýy múmkin ekenin meńzegennen keıin kóterildi. Buǵan deıin Eýrokomıssııa tóraǵasy Ýrsýla fon der Lıaıen Kanadaǵa osyndaı mártebe alý joly ashyq ekenin aıtqan.
EO men Aýstralııa arasyndaǵy saýda kelisimi ótken jyldyń naýryzynda aıaqtalǵan. Endi ony ratıfıkatsııalaý rásimi qaldy. Alaıda eki taraptaǵy fermerlerdiń et ónimderine belgilengen kvotalarǵa qatysty alańdaýshylyǵy kelisimdi bekitýge kedergi keltirýi múmkin.
Kelisim boıynsha Aýstralııanyń sıyr etine jylyna 30 600 tonna, qoı men qozy etine 25 myń tonna kvota qarastyrylǵan. Aýstralııalyq oppozıtsııa da kelisimge qarsylyq bildirip, ony qaıta qaraýǵa shaqyrdy.
Aýstralııa – Brazılııadan keıingi álemdegi sıyr etin eksporttaýshy ekinshi iri el. Brıýssel men Kanberra buǵan deıin aýyl sharýashylyǵy ónimderine qatysty kvotalar boıynsha kelise almaı, 2023 jyly kelissózderdi toqtatqan.
Eske sala ketsek, Tramp Kanada men Eýropalyq odaq arasyndaǵy áriptestik odan ári keńeıgen jaǵdaıda EO taýarlaryna joǵary baj salyǵyn engizýi nemese Eýropamen saýdany toqtatýy múmkin ekenin eskertip, málimdeme jasady.
