Aýstralııa elektrondy temeki satýǵa tyıym salady
Aýstralııada qańtar aıynan bastap balalar arasynda nıkotınge táýeldiliktiń aldyn alý úshin bir rettik elektrondy veıp satýǵa tyıym salynady. Kazinform agenttigi bul týrady VVS-ge silteme jasap habarlaıdy.
Sondaı-aq elde veıp óndirisi, ony jarnamalaý jáne jetkizýge tyıym salatyn jańa zańdar engiziledi. Bul – rekreatsııalyq veıpıngti tolyq toqtatý naýqanynyń bir bóligi.
Veıpıng temeki shegýden bas tartý ádisi retinde jarnamalanǵan, alaıda Aýstralııanyń densaýlyq saqtaý mınıstri bul «jańa nıkotın táýeldiligine» ákelgenin aıtty.
Elektrondy temekeni dáriger retseptinsiz satyp alý nemese ımporttaýǵa tyıym 2021 jyldan beri bar, biraq táýeldilik deńgeıi shekteýge qaramastan ósip keledi.
Sıdneı ýnıversıteti ǵalymdarynyń zertteýi 14 pen 17 jas aralyǵyndaǵy jasóspirimderdiń tórtten bir bóligi veıpıng tutynǵanyn anyqtady, al Australia's Cancer Council uıymynyń zertteý jumysynda bul jastaǵy jasóspirimderdiń onnan toǵyzy nıkotın veıpterge ońaı qol jetkize alatynyn anyqtady.
E-temekini ımporttaýǵa tyıym salýdy basqaryp otyrǵan Mark Batlerdiń aıtýynsha, bir rettik temeki ımportyna 1 qańtardan bastap tyıym salynatynyn, al terapevtik maqsatta emes qaıta toltyrylatyn temeki ónimderin ákelýge tyıym naýryz aıyna qaraı salynady.
Sarapshylar veıpıngtiń uzaq merzimdi áserleri týraly áli jetkilikti málimet joq ekenin eskertedi. Djons Hopkıns ýnıversıtetiniń zertteýi bul tájirıbeni sozylmaly ókpe aýrýy men demikpemen baılanystyryp otyr. Veıpterge quıylatyn suıyqtyqtaryn zerttegen Aýstralııa ǵalymdary olardyń quramynda ókpeniń densaýlyǵyna áser etetin «hımııalyq zattar jıyntyǵy» bar ekenin eskertti.
