Aýstralııa El-Nıno bastalǵanyn resmı túrde jarııalady
ASTANA.KAZINFORM - Aýstralııanyń Meteorologııa bıýrosy Tynyq muhıtynda El-Nıno qubylysy tirkelgenin resmı túrde jarııalady, dep habarlaıdy Reuters.
Aımaqtaǵy teńiz betiniń temperatýrasy El-Nıno sheginen asyp tústi jáne barlyq atmosferalyq kórsetkish bul qubylysqa sáıkes keldi.
Vedomstvo El-Nıno 2026 jyldyń ekinshi jartysynda kúsheıip, sońǵy jeti onjyldyqtaǵy eń kúshti qubylystardyń birine aınalýy múmkin ekenin eskertedi.
- Aýa raıynyń kúsheıýinen Amerıkada shamadan tys jaýyn-shashyn bolyp, Azııaǵa ystyq, qurǵaq aýa raıyn ákeledi. Onda daqyldar qazirdiń ózinde zaqymdalǵan, bul álemdegi eń kóp halqy bar aımaqta azyq-túlikpen qamtamasyz etýge qatysty alańdaýshylyq týdyrady, - delingen Meteorologııalyq bıýro málimdemesinde.
Meteorologtardyń aıtýynsha, klımattyq modelderdiń shamamen jartysy qazirgi oqıǵa 1950 jyldan bergi eń kúshti epızodtardyń biri bolýy múmkin dep boljaıdy.
Ortalyq jáne shyǵys Tynyq muhıtyndaǵy betki sýlardyń qalyptan tys jylynýymen sıpattalatyn El-Nıno Aýstralııa klımatyna aıtarlyqtaı áser etedi. Sarapshylar bul qys pen kóktemde, ásirese eldiń shyǵysynda jaýyn-shashynnyń azaıýyna ákeletinin jáne ońtústikte kúndizgi temperatýranyń joǵarylaýyna yqpal etetinin atap ótti.
Bul aýa raıy qubylysy ásirese Aýstralııa úshin qaýipti. Sebebi ol álemdegi bıdaı, qant jáne sıyr etin eksporttaıtyn eń iri elderdiń biri.
Derekter sońǵy 70 jylda elde qatty ystyq tolqyndarynyń jıiligi birtindep artqanyn kórsetedi.
Eldiń kóp bóliginde orman órti maýsymy uzardy. Al Aýstralııa aınalasyndaǵy muhıttar aldyńǵy onjyldyqtarǵa qaraǵanda tezirek jylynyp keledi. Elde 2023-2024 jyldary baıqalǵan sońǵy El-Nıno oqıǵasy tarıhtaǵy eń qurǵaq úsh aılyq kezeńge ákeldi.
Esterińizge sala keteıik, osy aıdyń basynda BUU aldaǵy aptalarda El-Nıno kúsheıetinin eskertken bolatyn.
