Aýstralııa COP31 konferentsııasyn Túrkııamen birge ótkizýden bas tartty
ASTANA. KAZINFORM – Premer-mınıstr Entonı Albaneze Aýstralııanyń Túrkııamen birge COP31 klımattyq sammıtin birlesip ótkizbeıtinin málimdedi. Sebebi eki el arasynda kelesi jylǵy konferentsııany qaısysy ótkizýi kerek degen másele boıynsha áli de kelispeýshilikter týyndap otyr, dep habarlaıdy Reuters.
2022 jyly Aýstralııa men Túrkııa COP31 sammıtin ótkizýge ótinish berdi, biraq eshqaısy ótinimin qaıtaryp alǵan joq, bul qazirgi ýaqytta Brazılııanyń Belem qalasynda ótip jatqan bıylǵy COP30 kezdesýinde sheshilýi tıis jaǵdaıǵa ákeldi.
Túrkııa kelesi jyly BUU klımattyq sammıtin Aýstralııamen birlesip ótkizýdi usyndy, biraq sammıtti ótkizý máselesi boıynsha kelissóz áli sheshilgen joq.
- Joq, biz birlesip ótkizbeımiz, sebebi bul Birikken Ulttar Uıymynyń Klımattyń ózgerýi jónindegi negizdemelik konventsııasynyń (BUUKShK) erejelerinde kózdelmegen, - dep málimdedi Albaneze.
Sońǵy aptalarda Albanııa men Túrkııa prezıdenti Rejep Taıyp Erdoǵan almasqan hattar jaǵdaıdy anyqtaı alǵan joq jáne eki taraptyń da ustanymyn nyǵaıta túsken sııaqty.
BUU erejeleri COP31 konferentsııasyn ótkizý kezegi kelgen «Batys Eýropa jáne basqalar» blogynyń 28 múshesiniń biraýyzdan kelisimin talap etip otyr. Bul blokqa Aýstralııa men Túrkııa kiredi. Eger Kanberra da, Ankara da ymyraǵa kele almasa, konferentsııany ótkizý mindeti BUU-nyń klımat máseleleri jónindegi shtab-páteri ornalasqan Germanııanyń Bonn qalasyna júkteledi. Alaıda nemis sheneýnikteri bul forýmdy qabyldaǵysy kelmeıtinin málimdedi.
Osyǵan deıin Brazılııanyń Belem qalasynda klımattyń ózgerýine baılanysty ótken BUU-nyń 30-shy konferentsııasynda 12 elden turatyn top klımattyń ózgerýi týraly deklaratsııaǵa qol qoıǵanyn jazǵan bolatynbyz.