Aýstralııa ashyq chempıonatyn asyǵa kútýdemin – Zarına Dııas
NUR-SULTAN. QazAqparat – Aýstralııa ashyq chempıonatyn asyǵa kútýdemin. Bul týraly qazaqstandyq tennısshi Zarına Dııas málim etti, dep habarlaıdyQazAqparat tilshisi Qazaqstan tennıs federatsııasyna silteme jasap.
Z.Dııas qatań karantın jaǵdaıynda jatqan tennısshiler qatarynda joq ekendigin jetkizdi.
«Keste boıynsha jattyǵa alamyn. Bizdi bekitilgen kestege sáıkes birneshe saǵatqa kortqa jiberedi. Aýstralııa ashyq chempıonatyna ázirlik jaqsy ótýde. Australian Open aldynda 31 qańtar men 6 aqpan aralyǵynda ótetin taǵy bir jarysqa
qatysamyn. Ázirge qaısysy (Gippsland Trophy nemese Yarra Valley Classic) ekeni belgisiz. Bul týrnırge oıynshylardy jerebe, álde reıtıng boıynsha ma, qalaı bóletinin bilmeımin», dedi Z.Dııas.
Zarınanyń sporttaǵy mańyzdy belesi osy Aýstralııa ashyq chempıonatymen baılanysty. 2014 jyly 20 jastaǵy Z.Dııas úshinshi aınalymǵa deıin jetip, onyń reıtıngte joǵary kóterilý joly bastalǵan bolatyn.
Al ótken jyly Qazaqstan tarıhynda tuńǵysh ret úsh birdeı tennısshimiz «Úlken dýlyǵa» týrnıriniń úshinshi aınalymyna ótti. Bıyl da qazaqstandyq sportshylardyń baryn salatyny anyq. Degenmen qatań karantınde jatqan ıÝlııa Pýtıntseva men Elena Rybakınaǵa mundaı shekteý ońaı tımeýde.
Eske sala keteıik, budan buryn Aýstralııa ashyq chempıonatyna kelgen 47 tennısshiniń karantınde jatqanyn, Elena Rybakınanyń bári de qatań ekenin málimdegenin jazǵan bolatynbyz.
