Australian Open: Jasóspirimder arasynda Ámir Omarhanov úshinshi aınalymǵa shyqty

MELЬBÝRN. KAZINFORM — Aýstralııa ashyq chempıonatynda jasóspirimder arasynda qazaqstandyq Ámir Omarhanov úshinshi aınalymǵa shyqty.

Bastapqy kezdesýinde jarystyń 1-raketkasy, ıtalııalyq Federıko Chınany utyp, sensatsııa jasaǵan 16 jastaǵy qazaqstandyq tennısshi ekinshi aınalymda ulybrıtanııalyq Vıktor Frıdrıhpen sheberlik baıqasty.

Birinshi partııada ulybrıtanııalyq 6:3 esebimen basymdyq tanytty.

Esesine ekinshi sette taı-breıkte Ámir sátti oınady — 7:6 (8:6).

Sheshýshi, úshinshi partııada Á.Omarhanov 5:3 esebimen alǵa shyqty.

Aqyry matchty taǵy bir breıkpen túıindedi — 6:3.

Tartysty match 2 saǵat 13 mınýtqa sozyldy.

Qaraǵandy tennıs mektebiniń túlegi shırek fınalǵa shyǵý úshin dodanyń 14-raketkasy, ońtústikkoreıalyq Hen Kımmen talasady.

Taǵy bir qazaqstandyq, 17 jastaǵy Asyljan Arystanbekova aýstralııalyq Talıa Kokınıske jol berip, alǵashqy aınalymnan asa almady.

Eske sala keteıik, budan buryn qazaqstandyq tennısshilerdiń halyqaralyq týrnırlerdiń fınalynan tys qalǵanyn jazǵan bolatynbyz.