Australian Open: Zarına Dııas úshinshi aınalymǵa shyqty
NUR-SULTAN. QazAqparat – Qazaqstandyq Zarına Dııas Aýstralııa ashyq chempıonatynyń úshinshi aınalymyna shyqty, dep habarlaıdy QazAqparat tilshisi.
Dúnıejúzilik reıtıngte 83-orynda turǵan Z.Dııas ekinshi aınalymda álemniń 66-raketkasy, amerıkalyq, túbi horvatııalyq Bernarda Peramen kezdesti.
Ótken jyly AQSh ashyq chempıonatynda qazaqstandyq tennısshi qarsylasynan 6:7 (4:7), 0:6 esebimen utylyp qalǵan bolatyn.
Birinshi partııa barysynda Z.Dııas áldeneshe ret breık-poınttaryn paıdalana almady. Degenmen toǵyzynshy geımde degenine jetti – 5:4. Sosyn setke dop bergende, esesin jibergen joq – 6:4.
Ekinshi sette amerıkalyq tennısshi breıkpen alǵa shyqty – 2:0. Aqyry ol osy basymdylyǵyn saqtap qaldy – 6:3. Bul partııada da Zarınanyń alty birdeı breık-poınty boldy.
Úshinshi, sheshýshi sette de B.Pera breık jasaı aldy – 2:1. Degenmen altynshy geımde Z.Dııas tarazy basyn teńestirdi – 3:3. Sodan keıin taǵy bir breıkpen esepti 5:3-ke jetkizdi. Sosyn matchbolyn múlt jibergen joq – 6:3.
Tartysty ótken báseke 2 saǵat 4 mınýtqa sozyldy.
Osylaısha Zarına 2020 jyly ketken esesin qaıtardy.
Z.Dııas úshinshi aınalymda álemniń 14-raketkasy, «Úlken dýlyǵa» týrnıriniń eki dúrkin jeńimpazy, ıspanııalyq Garbıne Mýgýrýsa nemese reıtıngte 130-satydaǵy reseılik Lıýdmıla Samsonovanyń bireýimen kortqa shyǵady.
Eske sala keteıik, budan buryn Elena Rybakınanyń ekinshi aınalymǵa ótkenin, ıÝlııa Pýtıntsevanyń AQSh chempıonyn joldan taıdyrǵanyn jazǵan bolatynbyz.
