Australian Open: Zarına Dııas tórtinshi aınalymǵa shyǵa almady
NUR-SULTAN. QazAqparat – Qazaqstandyq Zarına Dııas Aýstralııa ashyq chempıonatynyń tórtinshi aınalymyna shyǵa almady, dep habarlaıdy QazAqparat tilshisi.
Dúnıejúzilik reıtıngte 83-orynda turǵan Z.Dııas úshinshi aınalymda álemniń 14-raketkasy, Rolan Garros, Ýımbldon týrnırleriniń chempıony, ıspanııalyq, túbi venesýelalyq Garbıne Mýgýrýsamen kezdesti.
Birinshi partııada esep 1:1 bolǵan mezette ıspanııalyq sportshy breık jasap ketti. Sodan keıin de bes geımdi qatarynan aldy – 6:1.
Ekinshi sette de G.Mýgýrýsa tabysty oınaýyn jalǵastyrdy – 3:0. Tek osydan keıin ǵana Zarına óz geımin aldy – 1:3. Biraq ıspanııalyq tennısshi jeńistik bermedi – 6:1.
Match barysynda qazaqstandyq tennısshi jıirek qatelesip, bes birdeı breık-poıntyn paıdalana almady.
Báseke 56 mınýtqa ǵana sozyldy.
G.Mýgýrýsa shırek fınalǵa shyǵý úshin álemniń 3-raketkasy, «Úlken dýlyǵa» týrnıriniń úsh márte jeńimpazy, japonııalyq Naomı Osaka nemese reıtıngte 30-satydaǵy Týnıs ókili Ons Jaberdiń bireýimen talasady.
Osylaısha Aýstralııa ashyq chempıonatynda jekeleı synda ıÝlııa Pýtıntseva ǵana qaldy. Ol erteń úshinshi aınalymda álemniń 5-raketkasy, ýkraınalyq Elına Svıtolınamen kezdesedi.
Qazaqstandyqtar juptyq synda da onsha tabysty óner kórsetip jatqan joq. Keshe Elena Rybakına men ıAroslava Shvedova brazılııalyq-slovakııalyq jup Lýıza Stefanı – Heılı Karterge 4:6, 3:6 esebimen ese jiberdi. Al Z.Dııas pen ıÝ.Pýtıntseva reseılik Anna Kalınskaıa – slovakııalyq Vıktorııa Kýjmovadan asa almady – 4:6, 2:6.
Erler arasynda juptyq synda ekinshi aınalymǵa ótken Mıhaıl Kýkýshkın lıtvalyq Rıkardas Berankıspen birge búgin aýstralııalyqtar Djeıms Dakvort – Mark Polmanspen sheberlik baıqasyp, 6:7 (3:7), 2:6 esebimen utylyp qaldy.
Juptyq synda Qazaqstannan Aleksandr Býblık pen Andreı Golýbev qana qaldy. Olar búgin alǵashqy aınalymda ıtalııalyq Salvatore Karýzo – fın Emıl Rýýsývýorımen sheberlik baıqasady.
Sondaı-aq taǵy bir qazaqstandyq Dmıtrıı Popko Italııadaǵy Bella chellendjer dodasynyń shırek fınalyna shyǵa almady. Ol ekinshi aınalymda germanııalyq Danıel Mazýrdan 6:4, 2:6, 3:6 esebimen jeńildi.
Eske sala keteıik, budan buryn ıÝlııa Pýtıntsevanyń úshinshi aınalymǵa ótkenin jazǵan bolatynbyz.
