Australian Open: Zańǵar Nurlanuly alǵash ret jartylaı fınalǵa shyqty

ASTANA. KAZINFORM – Qazaqstandyq tennısshi, 17 jastaǵy Zańǵar Nurlanuly jasóspirimder arasynda Aýstralııa ashyq chempıonatynyń jartylaı fınalyna joldama aldy.

Jasóspirimder arasynda álemdik reıtıngide 12-orynda turǵan Zańǵar týrnırdiń 8-raketkasy bolyp tirkelgen.

Ol shırek fınalda Gonkong ókili Kaı Tompsonǵa qarsy keldi. Birinshi partııada gonkongtyq tennısshi 6:3 esebimen basymdyq tanytty. Taıtalasqa toly matchta ekinshi sette qazaqstandyq tennısshi taı-breıkte qarymta qaıyrdy – 7:6 (7:4).

Sheshýshi, úshinshi partııada esep 3:1 bolǵan mezette Tompson dop bergende, Zańǵar aıaǵynan jaraqat alyp qaldy. Aqsańdap ázer júrse de, ol breık jasaı aldy – 4:1. Biraq keleside óz geımin berip qoıdy – 4:2. Degenmen matchqa dop bergende, múmkindigin jibergen joq – 6:4.

Eki saǵat 50 mınýtqa sozylǵan tartysty básekede Zańǵar 3 eıspen birge 13 breık-poınttyń tórteýin óz esebine jazdy. Tompson 4 eıs, 4 breıkpen (12 breık-poınt) kózge tústi. Osylaısha, Zańǵar Nurlanuly sporttyq jolynda alǵash ret Aýstralııa ashyq chempıonatynyń jartylaı fınalyna shyqty.

Onyń kelesi qarsylasy keıin belgili bolady. Z.Nurlanuly ótken jyly jasóspirimder arasynda qazaqstandyqtardan tuńǵysh ret AQSh ashyq chempıonatynyń jartylaı fınalyna deıin jetken edi.

- Búgin osyndaı matchta jeńiske jetkenime qýanyshtymyn. Kelesi oıynǵa deıin jaraqatymdy emdep, qalpyma kelýge tyrysamyn. Jartylaı fınalǵa shyǵyp, bir maqsatymdy oryndadym. Endi Aýstralııa chempıonatynda tıtýl alǵym keledi, - dedi Qazaqstannyń jas juldyzy básekeden soń.

Eske sala keteıik, budan buryn Aýstralııa ashyq chempıonatynda Anna Danılınanyń ekinshi ret fınalǵa joldama alǵanyn jazǵan edik.

Aýstralııa chempıonatynda Elena Rybakına ekinshi ret chempıondyq ataqqa talasady.

Sondaı-aq Elena Rybakına álemdik reıtıngide úzdik úshtikke kiredi.