Australian Open: sheshýshi kezdesýler bastalmaq
ORAL. 25 qańtar. QazAqparat - Búgin áıelder arasynda Avstralııa ashyq chempıonatynyń jeńimpazy anyqtalmaq.
Sheshýshi kezdesýde qytaı qyzy Lı Na men slovakııalyq Domınıka Tsıbýlkova synǵa túsedi. Bul básekede qytaı qyzy favorıt bolyp esepteledi. Aldaǵy aqpanda 32 jasqa tolatyn Lı Nanyń juldyzdy sáti 2011 jyly týǵan bolatyn. Ol sol jyly «úlken dýlyǵanyń» biri - Rolan Garros týrnırinde qytaı qyzdary arasynan tuńǵysh ret chempıon atansa, Avstralııanyń ashyq birinshiliginde fınalǵa shyqty. Biraq onda belgııalyq ataqty tennısshi Kım Kleıstersten utylyp qaldy. Ol sondaı-aq ótken jyly da Avstralııa chempıonatynyń sońǵy matchynda belorýssııalyq Vıktorııa Azarenkoǵa ese jiberdi. Bul joly álemniń tórtinshi raketkasy úshinshi múmkindikti qalt jibere qoımas. Bıylǵy chempıonatta Lı Na úshinshi aınalymda chehııalyq 26 jasar Lıýsı Shafarjovadan jeńilip qala jazdady. Basqa kezdesýlerin eki partııada utyp shyqty. Onyń qarsylasy, álemniń jıyrmasynshy raketkasy, slovakııalyq 24 jasar Domınıka Tsıbýlkova buǵan deıin «úlken dýlyǵanyń» fınalyna shyǵyp kórmegen. Tek 2009 jyly Rolan Garrostyń jartylaı fınalynda ǵana oınaǵan. Bıylǵy Avstralııa ashyq chempıonatynda reseılik Marııa Sharapova, polıak Agneshka Radvanska syndy myqtylardy jeńgen D.Tsıbýlkova sońǵy synda baryn salary sózsiz. Tórtkúl dúnıe nazaryn tikken Melbýrndaǵy doda jeksenbide márege jetpek. Bul kúni sheshýshi shaıqasqa ıspanııalyq Rafael Nadal men shveıtsarııalyq Stanıslas Vavrınka shyǵady. «Úlken dýlyǵanyń» talaıyn utqan R.Nadal buǵan deıin Avstralııa chempıonatynda tek 2009 jyly bir-aq ret jeńimpaz atanǵan. Al S.Vavrınka úshin bul - alǵashqy fınal.
