Australian Open: Novak Djokovıch jartylaı fınaldyq kezdesýin aıaqtaı almady

ASTANA. KAZINFORM – «Úlken dýlyǵa» týrnıriniń 24 dúrkin chempıony, álemniń 7-raketkasy, 37 jastaǵy serbııalyq Novak Djokovıch Aýstralııa ashyq chempıonatynyń fınalyna shyǵa almady. 

Osyǵan deıin Aýstralııa birinshiliginde 10 ret úzdik shyqqan serbııalyq sportshy bul joly jartylaı fınalda álemniń 2-raketkasy, germanııalyq Aleksandr Zverevpen kezdesti.

Birinshi set 7:6 (7:5) esebimen A.Zverevtiń paıdasyna aıaqtalǵannan keıin N.Djokovıch jaraqatyna baılanysty matchty jalǵastyrýdan bas tartty.

- Bulshyq ettiń jyrtylýynan osyndaı kúıge tap boldym. Bir saǵat qalǵanǵa deıin emdeldim, fızıoterapevtiń kómegine júgindim. Munyń septigi boldy. Biraq birinshi settiń sońyna taman aýrý kúsheıe tústi. Sondyqtan toqtatýǵa májbúr boldym, - dedi Djokovıch.

Kórermender ysqyryp, shyǵaryp salǵan serbııalyq tennısshi Aýstralııa ashyq chempıonatynda sońǵy ret oınaýy múmkin ekenin de aıtty. 

- Bári maýsymnyń qalaı ótetinine baılanysty, - dedi dańqty tennısshi. 

Aýstralııa birinshiliginde 2008, 2011, 2012, 2013, 2015, 2016, 2019, 2020, 2021, 2023 jyldary úzdik shyqqan Novak osymen ekinshi ret básekeni jalǵastyrýdan bas tartyp otyr. Ol 2009 jyly shırek fınalda dál osylaı amerıkalyq Endı Roddıkke (7:6 (7:3), 4:6, 2:6, 1:2) jol bergen edi.

Novak Djokovıch 2022 jyly naǵyz babynda bolǵan kezinde taǵy bir márte top jarar ma edi, kim bilgen. Alaıda uıymdastyrýshylar serbııalyq tennısshi koronavırýsqa qarsy ekpe saldyrmaǵandyqtan, jarysqa qospady. Bul da talaı pikirge azyq boldy.

Al sporttyq jolynda alǵash ret «Úlken dýlyǵa» týrnıriniń fınalyna shyqqan A.Zverev chempıondyq ataq úshin álemniń 1-raketkasy, Italııa ókili ıAnnık Sınner nemese reıtıngide 20-oryndaǵy amerıkalyq Ben Sheltonnyń qaı jeńgenimen talasady.

Júlde qory 59,7 mln AQSh dollaryna baǵalanǵan Aýstralııa chempıonaty 26 qańtarda máresine jetedi.

Ótken jyly fınalda reseılik Danııl Medvedevti jeńgen ıA.Sınner kýbokty joǵary kótergen edi.

Eske sala keteıik, budan buryn Portýgalııadaǵy jarysta Popkony jeńgen Juqaevtyń shırek fınalǵa ótkenin jazǵan bolatynbyz.

Sondaı-aq Rybakınany jeńgen tennısshi Aýstralııa chempıonatynyń fınalyna shyqty.