Australian Open: Qazaqstandyqtardy utqan tennısshiler fınalǵa shyǵa almady
NUR-SULTAN. QazAqparat – Tennısten Aýstralııa ashyq chempıonatynda áıelder arasynda fınalǵa shyqqandar belgili boldy, dep habarlaıdy QazAqparat tilshisi.
Birinshi jartylaı fınalda álemniń 1-raketkasy, kort ıesi Eshlı Bartı men amerıkalyq Sofıa Kenın kezdesti.
Melbýrndaǵy «Rod Leıver Arena» stadıonynda ótken básekede 21 jastaǵy, túbi reseılik S.Kenın 7:6, 7:5 esebimen jeńiske jetti.
Buǵan deıin «Úlken dýlyǵa» týrnırlerinde «Rolan Garros» jarysynyń shırek fınalyna deıin ǵana jetken S.Kenın óz sporttyq jolynda alǵash ret sońǵy básekege joldama alyp otyr. Ol sondaı-aq aldaǵy dúısenbide jańartylatyn reıtıngte úzdik ondyqqa enedi.
Ekinshi jartylaı fınalda ıspanııalyq Garbıne Mýgýrýsa men rýmynııalyq Sımona Halep kortqa shyqty. Tartysty ótken matchta ıspanııalyq sportshy 7:6 (10:8), 7:5 esebimen qarsylasyn tize búktirdi. Osy týrnırdiń 4-raketkasy bolyp tirkelgen S.Halep ekinshi sette esep 5:4 bolǵanda, ózi dop bergenimen, sol múmkindigin paıdalana almady.
Buǵan deıin 2016 jyly «Rolan Garros», 2017 jyly Ýımbldon jarysyn utqan álemniń burynǵy 1-raketkasy G.Mýgýrýsa endi úshinshi márte «Úlken dýlyǵa» týrnıriniń chempıony atanýǵa bar kúshin salmaqshy.
Osylaısha qazaqstandyq tennısshilerdi jeńgen sportshylar fınalǵa óte almady. Úshinshi aınalymda E.Bartı Qazaqstannyń birinshi raketkasy Elena Rybakınany, S.Halep ıÝlııa Pýtıntsevany súrindirgen bolatyn. Al Zarına Dııasty joldan taıdyrǵan nıderlandylyq Kıkı Bertens G.Mýgýrýsadan utylyp qaldy. Degenmen bıylǵy Aýstralııa ashyq chempıonaty qazaqstandyqtar úshin tabysty boldy deýge negiz bar. Úsh birdeı tennısshi qyzymyz el tarıhynda tuńǵysh ret «Úlken dýlyǵa» týrnıriniń úshinshi aınalymyna ótti. Al erler arasynda Mıhaıl Kýkýshkın men Aleksandr Býblık alǵashqy bolyp juptyq synda jartylaı fınalǵa deıin jetti.
Eske sala keteıik, budan buryn M.Kýkýshkın men A.Býblıktiń fınalǵa óte almaǵanyn jazǵan bolatynbyz.
foto: 1winbk-official.ru