Australian Open: Elena Rybakına ekinshi aınalymǵa ótti
NUR-SULTAN. QazAqparat – Qazaqstannyń birinshi, álemniń 21-raketkasy Elena Rybakına Aýstralııa ashyq chempıonatynyń ekinshi aınalymyna shyqty, dep habarlaıdy QazAqparat tilshisi.
Elena Rybakına alǵashqy aınalymda álemdik reıtıngte ekinshi orynǵa deıin kóterilgen, qazir 145-satyda turǵan reseılik Vera Zvonarevamen sheberlik baıqasty.
Tájirıbeli V.Zvonareva 36-da bolsa, E.Rybakına 21 jasta ǵana edi.
Birinshi setti V.Zvonareva óz paıdasyna jazdy – 6:4.
Ekinshi partııada E.Rybakına 3:0 esebimen alǵa ketti. Reseılik tennısshi qaıyra breık jasap, esepti qysqartty. Degenmen qazaqstandyq sportshy óz degenine jete aldy – 6:4.
Sheshýshi, úshinshi sette E.Rybakına taǵy da 3:1 esebimen alǵa shyqqanymen, sol qarqynyn jalǵastyra almady. Áıtkenmen ol matchty jeńispen túıindedi – 6:4.
Tartysty match 2 saǵat 5 mınýtqa sozyldy.
E.Rybakına ekinshi aınalymda álemniń 46-raketkasy, frantsııalyq Fıona Ferromen kezdesedi.
Elena ótken jyly Rolan Garros týrnıriniń ekinshi aınalymynda dál osy tennısshige ese jibergen edi. Bul joly qarymta qaıyra ala ma, ony kort kórsetedi.
Eske sala keteıik, budan buryn Zarına Dııastyń Aýstralııa ashyq chempıonatyn jeńispen bastaǵanyn, al Mıhaıl Kýkýshkınniń AQSh chempıonynan utylyp qalǵanyn jazǵan bolatynbyz.
Sondaı-aq Aleksandr Býblık ekinshi aınalymǵa shyqty.
