Australian Open: Elena Rybakına shırek fınaldan tys qaldy

ASTANA. KAZINFORM – Qazaqstannyń birinshi, álemniń 7-raketkasy Elena Rybakına Aýstralııa ashyq chempıonatynyń shırek fınalyna shyǵa almady.

Qazaqstandyq tennısshi tórtinshi aınalymda álemniń 14-raketkasy, amerıkalyq Medıson Kızben sheberlik baıqasty. 

Qarsylastar osyǵan deıin tórt ret kezdesken edi, esep teń – 2:2. Ótken jyly Maıamıdegi (AQSh) sońǵy oıynda Rybakına 6:3, 7:5 esebimen jeńgen bolatyn.

Bul joly birinshi partııada Kız breıkpen alǵa ketti – 3:1. Sodan keıin setti taǵy bir breıkpen bitirdi – 6:3. 

Ekinshi setti Rybakına sátti bastap, aıqyn basymdylyqqa qol jetkizdi – 6:1.

Úshinshi, sheshýshi partııada Rybakına óz múmkindikterin paıdalana almasa, Kız sondaı sátterde sátti oınady - 6:3.

Bir saǵat 50 mınýtqa sozylǵan báseke barysynda qazaqstandyq sportshy 3 eıs jasap, 13 breık-poınttyń tórteýin ǵana paıdalandy. Kız 4 eıs, 5 breıkpen (9 breık-poınt) kózge tústi.
Medıson Kız jartylaı fınalǵa shyǵý úshin álemniń 27-raketkasy, ýkraınalyq Elına Svıtolınamen talasady. Ol dúnıejúzilik reıtıngide 75-orynda turǵan reseılik Veronıka Kýdermetovany joldan taıdyrdy – 6:4, 6:1.

Osylaısha, eresekter arasynda Aýstralııa chempıonatynda Qazaqstannan eshkim qalmady.

Eske sala keteıik, budan buryn jasóspirimder arasynda Aýstralııa ashyq chempıonatynda Zańǵar Nurlanulynyń juptyq syndaǵy kezdesýin sátti ótkizgenin jazǵan edik.

Z.Nurlanuly jekeleı synda ekinshi aınalymda bolgarııalyq Aleksandr Vasılevke jol berdi – 2:6, 4:6.