Australian Open: Elena Rybakına ótken jylǵy kórsetkishin jaqsartty

ASTANA. KAZINFORM – Qazaqstannyń birinshi, álemniń 5-raketkasy Elena Rybakına Aýstralııa ashyq chempıonatynyń shırek fınalyna joldama aldy.

Qazaqstandyq tennısshi tórtinshi aınalymda álemniń 21-raketkasy, belgııalyq Elıze Mertenspen sheberlik baıqasty.

Osyǵan deıin qarsylastar jeti ret kezdesip, sonyń altaýynda Rybakına jeńgen edi. 
Bul joly Elena matchty qarqyndy bastady – 6:1.

Ekinshi sette esep 2:2 bolǵan mezette Rybakına breık jasaı bildi. Aqyry matchty taǵy bir breıkpen túıindeı aldy – 6:3.

Bir saǵat 17 mınýtqa sozylǵan básekede E.Rybakına 10 eıspen birge 9 breık-poınttyń tórteýin paıdalandy. Mertens 3 eıspen shekteldi. 

Oıynnan soń suhbatynda qazaqstandyq tennısshi óziniń ázirge úzdik matchyn ótkizgenin, endi aldaǵy básekege daıyndalatynyn atap ótti. 

Elena Rybakına jartylaı fınalǵa shyǵý úshin álemniń 2-raketkasy, Polsha ókili Iga Shventek nemese reıtıngide 168-oryndaǵy aýstralııalyq Meddıson Inglıstiń qaı jeńgenimen talasady.

Osylaısha, E.Rybakına ótken jylǵy kórsetkishin jaqsartty. Ol 2025 jyly tórtinshi aınalymǵa deıin jetip, onda bolashaq chempıon, amerıkalyq Medıson Kızǵa jol bergen edi. Bıyl M.Kız tórtinshi aınalymda otandasy, álemniń 6-raketkasy Djessıka Pegýladan 3:6, 4:6 esebimen jeńilip, chempıondyq ataǵyn qorǵaı almady. 

Qazaqstandyq tennısshiniń 2023 jyly Aýstralııa ashyq chempıonatynyń fınalyna deıin jetip, álemniń 1-raketkasy, belorýssııalyq Arına Sobolenkoǵa jol bergeni belgili. 

Eske sala keteıik, budan buryn Aýstralııa ashyq chempıonatynda Zańǵar Nurlanulynyń úshinshi aınalymǵa joldama alǵanyn jazǵan edik.