Australian Open: Elena Rybakına ekinshi jeńisine qol jetkizdi

ASTANA. KAZINFORM – Qazaqstannyń birinshi, álemniń 5-raketkasy Elena Rybakına Aýstralııa ashyq chempıonatynyń úshinshi aınalymyna ótti.

Qazaqstandyq tennısshi ekinshi aınalymda álemniń 77-raketkasy, frantsııalyq Varvara Grachevamen betpe-bet keldi.

Osyǵan deıin qarsylastar ózara eki ret kezdesip, ekeýinde de Rybakına jeńgen edi.

Bul joly match Rybakına úshin qıyn bastaldy. Birinshi partııada esep 1:1 bolǵan mezette Gracheva breık jasap ketti – 3:1. E.Rybakına qatarynan tórt geım alyp, 5:3 esebimen alǵa shyqqanymen, setke dop bergende, óz múmkindigin paıdalana almady. Degenmen taǵy bir breıkpen támamdady - 7:5.

Ekinshi sette esep 2:1 bolǵanda, qazaqstandyq tennısshi breık jasady. Sodan keıin kezdesýdi breıkpen túıindedi – 6:2.

Bir saǵat 15 mınýtqa sozylǵan báseke barysynda Elena 5 eıspen birge 7 breık-poınttyń beseýin óz esebine jazdy. Gracheva 3 eıs, 2 breıkpen (7 breık-poınt) erekshelendi.

Qazaqstandyq tennısshi oıynnan soń bergen suhbatynda matchtyń ońaıǵa túspegenin, qarsylasynyń jaqsy óner kórsetkenin atap ótti.

Elena Rybakına tórtinshi aınalymǵa shyǵý úshin álemniń 54-raketkasy, chehııalyq, 18 jastaǵy Tereza Valentovamen talasady. Ol otandasy, reıtıngide 132-oryndaǵy Lında Frýhvırtovany qapy qaldyrdy – 7:5, 2:6, 6:3.

Eske sala keteıik, budan buryn Aýstralııa ashyq chempıonatynda Aleksandr Býblıktiń úshinshi aınalymǵa shyqqanyn jazǵan edik.

Sondaı-aq Mıhaıl Kýkýshkın Portýgalııadaǵy jarystyń shırek fınalyna joldama aldy.

Aýstralııa chempıonatynda Anna Danılına jeńisti joldy jalǵastyrdy.