Australian Open: Elena Rybakına ekinshi ret chempıondyq ataqqa talasady

ASTANA. KAZINFORM – Qazaqstannyń birinshi, álemniń 5-raketkasy Elena Rybakına Aýstralııa ashyq chempıonatynyń fınalyna shyqty. 

Qazaqstandyq tennısshi jartylaı fınalda álemniń 6-raketkasy, amerıkalyq Djessıka Pegýlaǵa tap keldi.

Qarsylastar osyǵan deıin ózara alty márte kezdesip, árqaısysy úsh-úshten jeńiske jetken edi. Bul joly breıkpen bastaǵan Rybakına 3:0 esebimen alǵa ketip, sol basymdylyǵyn saqtap qaldy – 6:3.

Ekinshi sette esep 1:1 bolǵannan keıin tennısshiler breıkpen almasty. Degenmen Elena breık jasap, esepti 5:3-ke jetkizdi. Biraq Pegýla da qalyspaı, Rybakınanyń úsh matchboldy paıdalanýyna múmkindik berdi – 5:5. Rybakına taı-breıkte degenine jetti – 7:6 (9:7). 

Bir saǵat 40 mınýtqa sozylǵan matchta Rybakına 6 eıspen birge 10 breık-poınttyń tórteýin óz esebine jazdy. Pegýla 2 eıs, 3 breıkpen (4 breık-poınt) kózge tústi. 

Elena Rybakına fınalda álemniń 1-raketkasy, Belarýs ókili Arına Sobolenkomen chempıondyq ataqty sarapqa salady. Ol jartylaı fınalda reıtıngide 12-oryndaǵy ýkraınalyq Elına Svıtolınany aıqyn basymdylyqpen jeńdi – 6:2, 6:3. 

2023 jyly Rybakına fınalda Sobolenkodan 6:4, 3:6, 4:6 esebimen jeńilip qalǵan edi. Belorýs tennısshi Aýstralııa chempıonatynyń fınalynda tórt ret óner kórsetip, sonyń ekeýinde jeńimpaz bolǵan.

Eske sala keteıik, budan buryn Aýstralııa ashyq chempıonatynda Anna Danılınanyń ekinshi ret fınalǵa joldama alǵanyn jazǵan edik.